وړاندې کوونکی: شیخ عصام عمیره (ابو عبدالله)       بیت المقدس، مبارکه خاوره (فلسطین)         

        ۱۴۴۰هـ.ق، د ربیع الثاني ۲۱مه، جمعه/ ۲۰۱۸م، د ډسمبر ۲۸مه

(ژباړه)

له څو میاشتو را هیسې د صلیبي ایتلاف الوتکو له ترورېزم سره د جګړې تر نامه لاندې د حجین په ښار او د دیرالزور په نورو سیمو کې بې ګناه مسلمانان وژني. دغو بریدونو د عاموژنې په ډول له سلګونو ښځو، ماشومانو او سپین‌ږېرو ژوند واخیست، چې په دغه کار سره یې انسانیت وشرماوه.

زموږ خلک نن په حجین کې د داعش د پاتې شونو، د صلیبي الوتکو د بریدونو او د سوریې د دیموکراتیکو ځواکونو د ځورولو په منځ کې ژوند کوي. د غرب لخوا روزل شوې رسنۍ، چې د بې‌طرفۍ ادعا کوي، هم د دوی په وینو کې شریکې دي. دا ټولو ته ښکاره ده چې رسنۍ کڼې او ګونګۍ شوې او حتی انسانیت یې هم له لاسه ورکړی؛ ځکه له هغه شي پرته چې ملاتړي یې تمه لري، بل څه نه ویني. دوی د هغو ډلو د مشرانو او قانون جوړوونکو پر وړاندې هم یو اړخیز چلند کوي، چې تر اوسه د انقلاب د کمزوري کېدو، ګوښه والي او ماتې لپاره کار کوي.

انقلاب په لومړیو کې د یوه وجود په شان متحد و، له یوې خوا یې د شمال، جنوب، لویدیځ او ختیځ په لور سیمې ازادولې او له بل لوري به یې په ملاتړ د ادلب او حمص اوسېدونکو دا شعارونه «اې درعا! موږ تر مرګه له تا سره یو.» او «اې دیرالزور! موږ تر مرګه له تا سره یو.» ورکول. دا حالت له هغه مخکې و چې د تنظیمونو مشران دې خپلې خېټې د هغو ملاتړو په غذا ډکې کړي، چې له مسلمانانو سره یې خپله ملګرتیا ختموله او هم وړاندې تر دې چې دوی دې د نورو هېوادونو د لاس آله وګرځوي. دوی او د دوی غړي یې د خلکو پر مټ ځواکمن کړل، د وسلې خوله یې له سمې خوا واړوله او د سختدریځه او منځلارو ډلو له ویشلو وروسته یې د یو او بل په لوري نښه ونیوله. هغه څه چې نن په حجین کې کېږي، سم دلاسه باید موږ ته دوې لاندې مسلې را یادې کړي: 

لومړی- د انقلاب د ماتې اصلي لامل دغه ځواکمنې او د غرب لخوا ملاتړې ډلې دي. په دې کې بیا مهمه مسله د خلکو چوپتیا او پر بدلون یې بې باوري کول وو او بله دا چې په شام کې یې چې کوم مسلمانان پاڅون ته هڅولي وو، د هغوی د چوپولو لامل هم دوی شول.

دویم- په عامه توګه مسلمانان او په ځانګړې توګه د شام خلک د غلامۍ تر ژغ لاندې او د صلیبیانو د نفرت په اور کې د هغه امام په نشتون کې سست شوي، چې د الله سبحانه وتعالی پر احکامو عمل کوي. هغه داسې ډال دی چې تر شا یې باید وجنګېږي او پرې وساتل شي. هغه خلیفه چې د دوی چارو ته پام کوي او د «وا معتصما» له چیغې سره سم د مظلومو مسلمانانو په ملاتړ فوځونه راوباسي.

نو اې د شام د اسلامي خاورې مسلمانانو! له حجین سره د مرستې او د شام، درعا او نورو سیمو له مظلومو خلکو څخه د ملاتړ او همدارنګه د رژیم د رانسکورولو تر ټولو لنډه لار د هغې وېرې له منځه وړل دي، چې د ډلو د مشرانو په وینه کې ګډه شوې. په دې سره انقلاب او د هغه تېر عزت او دبدبه یو ځل بیا راوستل کېږي. پوه شئ چې زموږ حالت به تر هغه ښه نه شي، څو مو چې د هر شي ارزښت په خپل ځای کې نه وي موندلی. یو له هغو څخه د الله سبحانه وتعالی له لوري پر موږ د لمانځه او روژې په څېر د اسلام د واکمنولو مکلفیت دی، چې د ژوند، دولت او ټولنې د نظام په توګه د راشده خلافت د تاسیس له لارې رامنځته کېدلی شي. یو ځل بیا هغه څه ته وګرځئ چې د جنایتکار اتاترک لخوا له منځه لاړ، ځکه چې په هغه کې مو عزت، ویاړ او دبدبه نغښتې ده. دا د الله سبحانه وتعالی ژمنه او د رسول الله صلی الله علیه وسلم زېری دی.

پوه شئ چې په انقلاب کې هم غمونه شته او هم د ورک شوي حق حل لاره. نو انقلاب باید د خپلې موخې په لور لاړ شي، چې هغه د رژیم او د هغه د جنایتونو ختمول دي او په دې هم پوه شئ چې ژغورل زموږ په لاس کې دي، نه زموږ د دښمنانو. تاسو د شام د فرعون پر وړاندې پاڅون کړی، نو په نیمه لار او له دې وروسته چې انقلاب یې ټولې توطیې او خیانتونه بربنډ کړل، مه دروئ او پوه شئ چې بریالیتوب د یوه ساعت صبر لپاره هم لاسته راځي او بله دا چې له هرې سختۍ تر شا اساني پټه ده. تاسو باید یو ځل بیا سر را پورته کړئ، څو بریالیتوب ووینئ او په لټه کې یې شئ. په دې سره یو ځل بیا په خپلو پاکو لاسونو سره دویم راشده خلافت جوړ کړئ او دا کار د الله سبحانه وتعالی لپاره سخت نه دی. الله سبحانه وتعالی فرمایي:

﴿وَعَدَ اللَّهُ الَّذِينَ آَمَنُوا مِنْكُمْ وَعَمِلُوا الصَّالِحَاتِ لَيَسْتَخْلِفَنَّهُمْ فِي الْأَرْضِ كَمَا اسْتَخْلَفَ الَّذِينَ مِنْ قَبْلِهِمْ وَلَيُمَكِّنَنَّ لَهُمْ دِينَهُمُ الَّذِي ارْتَضَى لَهُمْ وَلَيُبَدِّلَنَّهُمْ مِنْ بَعْدِ خَوْفِهِمْ أَمْناً يَعْبُدُونَنِي لَا يُشْرِكُونَ بِي شَيْئاً وَمَنْ كَفَرَ بَعْدَ ذَلِكَ فَأُولَئِكَ هُمُ الْفَاسِقُونَ﴾ [نور: ٥٥]

ژباړه: الله سبحانه وتعالی له هغو کسانو سره چې ایمان یې راوړی او نېک عملونه کوي، ژمنه کړې چې دوی به حتمي د تېرو کسانو په څېر په ځمکه کې خلفا ټاکي. د دوی لپاره به هغه دین ځواکمن کړي چې الله سبحانه وتعالی ورته غوره کړی او وېره به یې په امن ورته بدله کړي. دوی دې زما بندګي کوي، له ماسره دې څه نه شریکوي او څوک چې له هغه وروسته ناشکري وکړي، نو هغه ډله فاسقان دي.  

احمد عبدالوهاب

د حزب التحریر-ولایه سوریې د مطبوعاتي دفتر رییس

(ژباړه)

خبر:

ټرمپ له سوریې څخه خپل سرتیري باسي.

تبصره:

له سوریې څخه د سرتېرو ايستلو اړوند د ټرمپ اعلان په کانګریس کې د نیوکو طوفان رامنځته کړ، حتی د جمهوري غوښتونکي ګوند ځینو غړو هم نیوکې وکړې. د دې تر څنګ د امریکا د مرکزي قوماندۍ مشر جنرال جوزیف وټل د ''اسلامي دولت'' ډلې پرضد ایتلاف کې د امریکا د ولسمشر ځانګړي استازي بریټ ماکګورک د سرتیرو اېستلو پر پرېکړې سخته نیوکه وکړه، چې حتی د امریکا متحده ایالاتو د دفاع وزیر جیمز مټیس د دغې پرېکړې له امله استعفا وړاندې کړه. تر ټولو مهمه دا چې د سوریې کردیانو خپله ژوره اندېښنه څرګنده کړه.

پوښتنه دا ده، چې ولې ټرمپ پر پراخو مخالفتونو سربېره د سرتېرو ایستلو پرېکړه وکړه؟ ایا دا د ټرمپ ناببره هڅه ده، که د یوې سترې ستراتېژۍ یوه برخه ده؟

لومړی باید دا ووایو، چې د سرتېرو ایستل هیڅکله په دې معنی نه شي کېدی، چې په سیمه کې به د امریکا  حضور یا نفوذ له منځه ولاړ شي. په ځانګړې توګه که څه هم چې د سرتېرو ایستل یوازې د هغو څو زره سرتیرو ایستل دي، چې د سوریې په جګړه کې بوخت دي. مګر برعکس تاریخ موږ ته په بشپړه توګه د دې خلاف ښوونه کړې. د بهرنیو پوځیانو اشغال یا پوځي حضور د دغو اشغالګرو هېوادونو د اشغال له وسیلو څخه یوه وسیله ده.

ویل کیږي چې ټرمپ د روان کال په مارچ کې وویل، چې «موږ جګړه ګټلې» او دی به خپل سرتیري بېرته خپل هېواد ته ستانه کړي، خو د ایستلو نیټه یې نه وه په ډاګه کړې؛ مګر ده خپلې موخې له کوم سخت مخالفت پرته شاته پرېښودلې. خو اوسمهال یې چې د ایستلو اراده کړې، دې پرېکړې د تندر په شان یوه غوغا خپره کړه. له همدې امله د ټرمپ د پرېکړې پر وړاندې داسې غبرګونونه، باید په احتمالي توګه، د امریکا په متحده ایالاتو کې له ټرمپ سره د ځینو ګوندنو د پخوانيو حساسیتونو درلودلو په رڼا کې وارزول شي.

پر دغو مخالفتونو سربېره چې په یو لړ سرچینو پورې اړوند دي، د سوریې په اړه د امریکا متحده ایالاتو دا دریځ نه و په ګوته شوی. د سوریې رژیم او سیکولر نظام باید پر ځای پاتې شي که بشار اسد وي که نه او په اسلامي پروژه کې مخالفتونه باید یا ودرول شي یا اشغال کړل شي یا هم له منځه یووړل شي.  دا د امریکا او د هغې د ملګرو؛ ترکیې، ایران او روسیې د تېرو اوو کلونو پالیسۍ لپاره کره شننه ده.

د دغې پالیسۍ په پایله کې د سوریې کمزوري رژیم له ادلب پرته، چې تر اوسه مخالفین پکې میشت دي او د کردیانو سیمه، چې یو نیمه خپلواک حکومت یې پکې جوړ کړی، د سوریې ډېرۍ سیمې بېرته تر خپلې ولکې لاندې راوستلې. داسې ښکاري چې د لوبې وروستۍ برخه را رسېدلې؛ د سوریې د رژیم د یووالي او بیا په پښو درېدلو پر وړاندې یوازې دوه خنډونه شته دي؛ د سوریې پاتې مخالفین او د سوريې په شمال کې کردیان.

د کرديانو د سیمې په اړه باید ووایو، چې امریکا کردیان تقویه کړل او د ترکیې د بغدادي د ګروپ او نورو اسلامي ډلو پر وړاندې یې په اغیزمنه توګه وکارول. امریکا د سرتېرو له اېستلو سره به کردیان یوازې او بې دفاع پاتې شي، چې له یو لوري د ترکیې له ګواښ سره مخ دي او له بلې خوا د بشار اسد له ګواښ سره، چې غواړي د سوریې ټولې سیمې د مرکزي حکومت تر ولکې لاندې را ولي.

له همدې امله د کردیانو مشر کله چې د امریکا د وتلو پرېکړه واروېده، په چټکۍ یې له دمشق سره د مخامخ خبرو اترو لپاره د ناستې پرېکړه وکړه. په دې ډول کردیان په غیر مستقیمه توګه د سوریې له رژیم سره خبرو اترو ته اړ اېستل شول، چې په دې سره به شمالي سوریه ډېره ژر پر یوه واحده سوریه بدله شي.

همدارنګه د ترکیې د بهرنیو چارو د وزیر مولود چاووش اوغلو د پام وړ غبرګون، چې ویې ویل ترکیه او د نړۍ نور قدرتونه به هغه مهال له بشار اسد سره ګډ کار وکړي، کله چې اسد په ډیموکراتیکو ټاکنو کې بریالی شي. د سوډان ولسمشر عمر البشیر له بشار اسد سره په کتنه کې وویل، موږ امید لرو، چې سوریه به ډېر ژر بېرته خپل مهم سیمه‌ییز رول تر لاسه کړي. د دغه قاتل رژیم په رسمیت پېژندلو سره د امریکا راتلونکی حرکت څرګندېدلی شي.

د عربو په لیګ کې د سوریې د بیا یو ځای کېدو خبرې مخکې له مخکې په واقعیت بدلې شوې. د دې په اړه په قاهره کې د عربو لیګ مرکز د رسینو له لوري چې د سپوټنیک (د روسیې سټلایت) پر ضد یې خبرې کولې، تشریحات ورکړل شوي وو.

له دې مخکې د تونس د ولسمشر ادارې یوې پخې سرچینې ویلي وو، چې د تونس او الجزایر په ګډون یو شمېر عربي هېودوونه په ګډه هڅه کوي، چې سوریه بېرته دغه سازمان ته راوګرځوي. د ویاند په حواله تونس، عراق او الجزایر په دې غور کوي، چې سوریه بیا د عربو په لیګ کې د پوره برخې اخیستنې لپاره ورګډه کړي.

د روسیې د بهرینو چارو وزیر هم د امریکا د سرتېرو د وتلو هرکلی وکړ، هغه زیاته کړه چې په دې وتلو سره به د سوریې قضیه له سیاسي لارې حل او فصل شي.

د سرتېرو د ایستلو له اعلان څخه مخکې د ټرمپ او اردغان تلیفوني خبرې اترې دا په ډاګه کوي، چې د سرتېرو دایستلو دا پرېکړه یوه ناڅاپي پرېکړه نه ده، بلکې دا د امریکا او د هغې د ملګرو یو ستر شیطاني پلان و، چې پر مټ یې وکولی شي، د سوریې پاڅون له منځه یوسي.

﴿وَإِذْ يَمْكُرُ بِكَ الَّذِينَ كَفَرُوا لِيُثْبِتُوكَ أَوْ يَقْتُلُوكَ أَوْ يُخْرِجُوكَ وَيَمْكُرُونَ وَيَمْكُرُ اللَّهُ وَاللَّهُ خَيْرُ الْمَاكِرِينَ﴾ [انفال: ۳۰]

ژباړه: هغه وخت (هم د یادونې وړ دی) چې د حق منکرانو ستا پر خلاف دسیسې جوړولې، چې بندي دي کړي یا دې ووژني یا دې له خپل دیاره وشړي. هغوی خپل تدبیرونه په کار اچول او الله (سبحانه وتعالی) خپل تدبیر کاوه. الله (سبحانه وتعالی) تر ټولو ډېر ښه تدبیر کوونکی دی.

د حزب التحریر د مرکزي مطبوعاتي دفتر لپاره

لیکوال: اوکې پالا

په هالنډ کې د حزب التحریر مطبوعاتي استازی

ژباړن: فرید نهضت

(ژباړه)

إِنَّ الَّذِينَ كَفَرُوا يُنفِقُونَ أَمْوَالَهُمْ لِيَصُدُّوا عَن سَبِيلِ اللَّهِ فَسَيُنفِقُونَهَا ثُمَّ تَكُونُ عَلَيْهِمْ حَسْرَةً ثُمَّ يُغْلَبُونَ وَالَّذِينَ كَفَرُوا إِلَى جَهَنَّمَ يُحْشَرُونَ﴾

[انفال: 36]

ژباړه: هغوی چې کافر شوي، خپلې شتمنۍ د الله سبحانه وتعالی له لارې د خلکو په راګرځولو لګوي. دوی چې د دغه مال په تر لاسه کولو زیار اېستلی، په دې لار کې لګوي. خو د دوی د ارمان او غم لامل به شي. وروسته به ماتې وخوري او په اخرت کې به کافران ټول د دوزخ په لوري راټولیږي.

د قرآن کریم دا ایت د قریشو د حالت بیانوونکی دی. کله چې قریشو خپل ډېری مشران او رهبران د بدر په جنګ کې له لاسه ورکړي وو، وروسته د دې په لټه کې شول چې ډېره شتمني تر لاسه کړي، څو د اسلام او رسول الله صلی الله علیه وسلم پر وړاندې خپلې مبارزې ته دوام ورکړي.

د ابن کثیر د تفسیر پر اساس، الله سبحانه وتعالی دا ایت کلي بیانوي او د ټولو هغه کافرانو لپاره دی، چې خپلې شتمنۍ له حق لارې د خلکو په راګرځولو لګوي. په داسې کړنو به یې یوازې پيسې مصرف شي او په پای کې به له افسوس او غم پرته بل هېڅ هم تر لاسه نه کړي. دوی د الله سبحانه وتعالی د نور په وژلو پسې دي. په خپل لاس جوړ شوي قوانین د الله سبحانه وتعالی له حکم څخه لوړ بولي. خو الله سبحانه وتعالی به خپل نور کاملوي، که کافران نفرت هم ورنه ولري. دغه راز به الله سبحانه وتعالی خپل دین پر نورو دینونو حاکم او بریالی کړي.

نو پورته ایت د اسلام او مسلمانانو له اوسني واقعیت سره سمون خوري. لکه اوسمهال چې کفري هېوادونه خپله زیاته اندازه شتمني له مسلمانانو سره په مبارزه کې لګوي. د بېلګې په توګه د چین ظالم دولت په سینکیانګ ایالت کې د بیا زده کړې په نامه مرکزونه جوړ کړي او د یوه اټکل پر اساس شاوخوا 3 میلیونه مسلمانان یې پکې زنداني کړي. په دغه کمپونو کې مسلمانان شکنجه کوي او ناوړه ګټه ترې اخلي. د خوګ غوښې خوراک او شرابو څښلو ته یې اړ کوي. د خپلو عقیدو ردولو ته یې مجبوروي. په داسې حال کې چې  دغه ټولې ترهګریزې پېښې د هغه نړۍ تر مخه تر سره کېږي، چې له چین سره په اړیکو ټینګولو خپلې شتمنۍ لګوي.

همداراز نړۍ د برما دولت لخوا د روهینګیایي مسلمانانو د ازار او اذیت د دوام شاهده وه، چې دا د اسلام او مسلمانانو پر وړاندې یوه بله جګړه وه. نړۍ نه یوازې خپلې سترګې پټې کړي؛ بلکې انګلیس د برما دولت ته د وسلې د پلورلو له لارې د 500 سوه زره پونډو په ارزښت مرسته وکړه. کله چې ګورو د هغه مسلمانانو شمېر زیاتیږي، چې یوازې د مسلمانۍ په خاطر شکنجه او ځورول کېږي. ممکن د ناهیلۍ احساس پر موږ زورور شي. په ځانګړې توګه کله چې هېڅ بدلون نه وینو او له بله اړخه احساسوو، چې دښمن ورځ په ورځ قوي کېږي. نو داسې احاساسات د کمزورۍ لامل ګرځي. دغه راز د دې لامل ګرځي، چې د دعوت په لار کې مو پر ځان باور له منځه یوسي، چې د نړۍ په لر او بر کې د مسلمانانو د حالت بدلوونکی دی او موږ په دغه لار کې فعالیت ونه کړو. نو موږ باید په داسې حال کې په قران او سنتو منګولې ولګوو، څو دا ډول احساسات راباندې زورور نه شي، باید ارامتیا په قران او سنتو کې ولټوو؛ ځکه الله سبحانه وتعالی علم الغیب لري او زموږ اوسنی حالت یې ډېر دقیق بیان کړی. تر څنګ یې له ستونزو د وتو دقیقه د حل لار راته وړاندې کړې ده.

 الله سبحانه وتعالی فرمایي:

﴿وَلَا تَهِنُوا وَلَا تَحْزَنُوا وَأَنتُمُ الْأَعْلَوْنَ إِن كُنتُم مُّؤْمِنِينَ﴾

[آل عمران: 139]

ژباړه:سست او غمجن  کېږئ مه. که اېمان ولرئ نو تاسو غوره یاست!

﴿إِنَّمَا الْمُؤْمِنُونَ الَّذِينَ إِذَا ذُكِرَ اللَّهُ وَجِلَتْ قُلُوبُهُمْ وَإِذَا تُلِيَتْ عَلَيْهِمْ آيَاتُهُ زَادَتْهُمْ إِيمَانًا وَعَلَىٰ رَبِّهِمْ يَتَوَكَّلُونَ﴾

[انفال: 2]

ژباړه: مومنان یوازې هغه کسان دي، چې کله د الله نوم واخیستل شي زړونه یې ویریږي او کله چې ایاتونه ورته ویل کېږي اېمان یې قوي کېږي، یوازې په خپل خالق توکل لري.

موږ باید قوي وو او کلک هوډ ولرو، یوازې په خپل خالق تکیه وکړو. په هغه بریا او نصرت باور ولرو، چې د الله سبحانه وتعالی لخوا راتلونکی دی؛ ځکه الله سبحانه وتعالی د هغو کفارو په مقابل کې له مسلمانانو سره مرسته کوي، چې له دوی سره جنګېږي او ظلم پرې کوي. نو پوه به شو، چې بریالیتوب یوازې د الله سبحانه وتعالی لخوا تر لاسه کېږي. دغه راز د الهي اوامرو پیروي زموږ دنده ده، چې له دمې پرته د مسلمانانو وروڼو او خویندو د ستونزو له منځه وړلو ته کار وکړو. هغوی ته د شتمنو کسانو او د اسلامي خاورې هېوادونو په پوځ انګېزه ورکړو. همدا شان خپلو مسوولیتونو ته د اسلامي امت متوجه کول دي، چې د اسلام لېږد او د کفارو ظلم او تیري ته د پای ټکی اېښودل دي. موږ باید خپل دعوت ته دوام ورکړو، ځکه الله سبحانه وتعالی موږ ته امر کړی، چې اسلام ته په دعوت سره د مسلمانانو حالت بدل کړو او الهي قوانین د منهج پر نبووت د خلافت په تاسیس سره پلي کړو.

﴿وَمَا جَعَلَهُ اللَّهُ إِلَّا بُشْرَىٰ وَلِتَطْمَئِنَّ بِهِ قُلُوبُكُمْ وَمَا النَّصْرُ إِلَّا مِنْ عِندِ اللَّهِ إِنَّ اللَّهَ عَزِيزٌ حَكِيمٌ﴾

 [انفال: 10]

ژباړه: ولې الله سبحانه وتعالی دا یوازې ستاسو د خوښۍ او د زړه ډاډ لپاره درکړ؛ که بریا یوازې د الله سبحانه وتعالی له طرفه نه ده! الله سبحانه وتعالی توانا او حکیم دی!

لیکواله: یاسمین ملک

د حزب التحریر مرکزي مطبوعاتي دفتر غړې

ژباړن: حبیب الله