سه شنبه, ۰۲ ربیع الاول ۱۴۴۴هـ| ۲۰۲۲/۰۹/۲۷م
ساعت: مدینه منوره
Menu
القائمة الرئيسية
القائمة الرئيسية

pr header

 

 

هجری قمری نېټه :     7 صفر 1444

میلادی نېټه :     شنبه, 03 سپټمبر 2022 م

شمیره:      3/1444

مطبوعاتی دفتر
ولایه افغانستان

مطبوعاتي اعلامیه
د مولوي صاحب انصاري شهادت د مرموزو استخباراتي وژنو دوام دی!

د هرات د ګزرګاه جومات د چاودنې په پايله کې د دغه جومات خطيب مولوي صاحب انصاري د ۱۷ تنو په ګډون په شهادت ورسېد او لسګونه تنه نور پکې ټپيان شول. د حزب التحرير ـ ولايه افغانستان مطبوعاتي دفتر دا وحشيانه بريد او ترور د ټولو انساني او شرعي موازينو خلاف بولي او په سختو ټکو يې غندي. الله تعالی دې د شهيدانو شهادت قبول کړي، ټپيانو ته دې عاجله شفا او د هغوی خپلوانو ته دې جميل صبر او لوی اجر ورپه برخه کړي.

دا لومړی ځل نه دی چې موږ د دغه امت د علماوو، متنفذينو او مخورو د ترور شاهدان يو، په ځانګړي ډول په وروستيو شلو کلونو کې چې افغانستان د اشغال او استعمار تر ولکې لاندې و، د علماوو او متنفذينو ځنځيري او هدفي وژنو په شدت سره دوام درلود، اشغالګرو او د هغوی استخباراتي کړيو په دې خاوره کې ډېرې مرموزې وژنې وکړې، ترڅو هغه کسان چې په خلکو کې هويت او محبوبيت لري او هغه کسان چې د اشغالګرو د پلانونو او دسيسو پر وړاندې خنډ کېږي، په يو ډول نه يو ډول منزوي کړي، شخصيت يې ترور او يا يې په شهادت ورسوي، چې د مولوي صاحب انصاري شهادت د همدغو استخباراتي فعاليتونو دوام دی.

اشغال په افغانستان کې ماتې وخوړه، خو اشغالګران ارام نه دي ناست. د اسلام دښمنان له مختلفو اساليبو څخه په استفادې غواړي چې د اسلامي ارزښتونو، حاکم نظام، او د دې خاورې د علماوو او متنفذينو پر وړاندې بې درېغه بريدونه وکړي، ترڅو له يوه اړخه پر اسلامي امارت فشار راوړي او له ننګونو سره يې مخ کړي او له بله اړخه هغه کسان له منځه يوسي چې دوی يې د خپلو موخو په لار کې خنډ بولي. بناءً اسلامي امارت بايد درک کړي، چې غربي استعمار او سيمه‌ييز همکاران يې مختلفې څېرې لري؛ دښمن کله د پيسو د مرستو په بڼه راڅرګندېږي، کله د خيريه بنسټونو په بڼه، کله د مدني فعاليتونو، لاريونونو او مطبوعاتي فشارونو په بڼه، کله د سياسي فشارونو او کله هم د مرموزو استخباراتي فعاليتونو او هدفي ترورونو په بڼه.

موږ پخوا هم په وار وار د دښمن دا ډول دسيسې افشا کړې او د ټولنې مشران مو ترې خبر کړي دي. نن هم دا حقيقت تکراروو چې غرب څو اړخه او پېچلی سياست کوي؛ په ښکاره د بشري مرستو او بشري حقونو خبرې کوي، خو په عمل کې په افغانستان او سيمه کې د يو باثباته او ځواکمن دولت د رامنځه کېدو مخه نيسي. بايد پوه شو چې يوازې له امت سره نږديوالی او د شريعت بشپړ تطبيق کولی شي د داخلي فتنو مخه ونيسي، بهرنۍ دسيسې خنثا کړي، مجرمين مجازات کړي او د مسلمانانو ځاني او مالي امنيت خوندي کړي. د يو قوي اسلامي هويت رامنځته کول او د يوې باثباته ټولنې احياء موږ ته دا وړتيا راکوي چې د خپل بهرني دښمن په مقابل کې د اوسپنيز دېوال په څېر ودرېږو او د هغوی د هر ډول کيد او مکر پر وړاندې بريالي شو.

د حزب‌التحریر - ولایه افغانستان مطبوعاتي دفتر

نظر ورکړئ

اسلامي خاورې

اسلامي خاورې

غربي هېوادونه

ټول لینکونه

د پاڼې برخې