د حزب التحریر د مرکزي مطبوعاتي دفتر د ښځو څانګې د فبرورۍ په ۱۶مه د "خلافت او تعليم: د طلايي دورې بيا را ژوندي کول" تر سرليک لاندې نړيوال کمپاين پيل کړ. د الله سبحانه وتعالی په مرسته به د روان ميلادي کال د مارچ په ۱۱مه د اندونيزيا په جاکارتا ښار کې د ښځو په لوی، مهم او نړيوال کنفرانس پای ته ورسېږي، چې د نړۍ له ګوټ – ګوټ څخه به ويناوالې ولري.

اوسمهال نړۍ په بېلا بېلو اړخونو کې له تعلیمي ناورین سره مخ ده، چې په عامه توګه د باکیفیته مکتبونو، پوهنځيو، پوهنتونونو او نورو تعلیمي اسانتیاوو له نشت څخه ځورېږي. په سیمه کې په لوړه کچه بېسوادي، د زده کړې ټيټه کچه او ښوونکو ته کم معاش ورکول، د تدریس وروسته پاتې میتود، په اسلام کې هر اړخیزې پوهنې او روزنې ته نه لاسرسی، په دیني برخه کې د بورسونو نشت، د تخصص او څېړنې لپاره نابسیا سرچینې او پر دې سربېره د شاګردانو د ښه تعلیم لپاره پر والدینو ستر مالي بار بله ستونزه ده.

دغو ټولو ستونزو د راتلونکي نسل تعلیمي ارزوګانې زیانمنې کړې، د دوی مغزونه یې د غرب لوري ته رهبري کړي، چې په دغه کار په اسلامي نړۍ کې د پرمختګ او پراختیا مخه ونیول شوه. د خلافت له نړېدو وروسته د نهو لسیزو راهیسې په اسلامي خاورو کې د استعماري تعلیمي نصاب تطبیق د دغه تعلیمي ناورین لامل شو. دا ډول تعلیمي سیستمونه هېڅکله د امت د زده کړې ارزوګاني نه شي پوره کولی او په ټولنو کې د علمي کچې لوړېدل او په اسلامي خاورو کې پرمختګ او پراختیا ناشونې کوي. له بلې خوا دغه سیستمونونه د ښکېلاکګرو له خوا د دې لپاره پیل شوی دي چې د مسلمانانو راتلونکو نسلونو ته خپل لېبرال سیکولر کلتور ور زده، خپور او ساتنه يې وکړي. همدارنګه دوی اسلامي زده کړې محدودې او سیکولر میتود ته اړوي. د دوی موخه دا ده چې د ځوانو مسلمانانو ذهنونه مستعمره او په سیمه کې د خپلو استعماري موخو د لاس ته راوړو لپاره دوی د غربي کلتور او نظام غلامان کړي. په اسلامي نړۍ کې په غربي فرهنګ او رهبرۍ روزل شوي نسلونه د دوی تعلیمي نظام تطبیقوي او د عامه افکارو د غولونې لپاره يې په تعلیمي نظام کې د پردې تر شا د پرمختګ او تعلیم تر تامه لاندې دروغجن اصلاحات منځته راوړي. دا ډول تعلیمي منهجونه هېڅ خپلواک لید نه لري، چې په مخلص ډول د هغو خلکو تعلیمي اړتیاوې چې تر دغه نظام لاندې اوسېږي پوره کړي او نه يې د خارو په پرمختګ کې څه مرسته کولی شي. په دې وروستیو کلونو کې په اسلامي نړۍ کې د تعلیمي سیستم سیکولر کولو موضوع پیاوړې شوې. سربېره پر دې له څو لسیزو راهیسې د پانګوالۍ فاسد نظام او سیاستو له امله د تعلیم په برخه کې کمه پانګونه، همدار راز د یوه روښانه لید نشت، چې د زده کړې ټولې اړتیاوې پوره کړي، دا ټول په دغه تعلیمي ناورین کې رول لري او د دغه نظام پر ناکامۍ دلالت کوي.

 زموږ خاورو د خلافت د اسلامي قوانینو تر سیوري لاندې په داسې طریقه چې اسلام يې توصیه کوله، د علم حاصلولو او خپرولو ته زیات اهمیت ورکاوه او اسلامي نړۍ یو وخت د نړۍ د زده کړې مرکز و. د تعلیمي موسسو  لوړتیا د نړۍ له ګوټ ګوټ څخه غوره اکاډمېسن او متفکران را جلب کړل. زرګونو شاګردانو ته یې په لوړه کچه د زده کړې لار هواره کړه، چې ګڼ شمېر پوهان او عالمان یې ټولنې ته وړاندې کول. دا د اختراعاتو او نوښتونو یوه زرینه دوره وه چې داسې لوړ پرتمین  تمدن یې رامنځته کړ، چې په نړیوال زبرځواک بدل شو. دا زمونږ دنده ده چې د اسلامي خلافت د بیا راتګ لپاره نه ستړې کېدونکې هڅې وکړو. هغه د حق او عدل خلافت چې نه یوازې اسلامي نړۍ، بلکې شاوخوا ته به هم د تعلیمي نظام چراغ روښانه کړي. دغه کمپاین او کنفرانس به په نړیواله کچه مسلمانان د رسول الله صلی الله علیه وسلم پر تګلاره د خلافت په تاسیس د تعلیم او پرمختګ طلایي دورې بیا راژوندي کولو ته را وبولي. دا به د خلافت د تعلیمي تګلارې یو لرلید وړاندې کړي چې له مخې به یې د تعلیم داسې پیاوړی نظام رامنځته کړي، چې ټولنې ته  به مسلمان ځوانان د اسلامي شخصیتونو په توګه ته وړاندې کوي. د نارینه او ښځو تعلیمي ارمانونه به په مساوي توګه پوره کړي. د طلایي بورسونو وېش به بیا راژوندی کړي او یو پرمختللی تمدن چې نړۍ ته به داسې نوښتونه راوړي چې هغه به د علم او صنعت د پرمختګ وسیله وګرځي. همدا راز دغه کمپاین او کنفراس به په اسلامي نړۍ کې د تعلیم د سیکولر کولو موضوع، چې په سیمه کې د تعلیمي ناورین سبب ګرځېدلې، را بربنډه کړي. سربېره پر دې به مسلمانو ماشومانو ته د خلافت په نشت کې د اسلامي تعلیم د زده ګړې لارښونه وړاندې کړي.

په یوټيوب کې د کمپاین د پیل ویدیو په دغه لینک کې کتلی شئ: https://youtu.be/IOz4G979Mgw

کمپاین په دغه پاڼه کې تعقیبولی شئ: https://goo.gl/g9Wt2B

د کمپاین فېسبوکپاڼه: www.facebook.com/WomenandShariah

ډاکتر نسرین نواز

د حزب التحریر د مرکزي مطبوعاتي دفتر د ښځو د برخې رييسه