(ژباړه)

د صحیح البخاري په شرحه فتح الباري کتاب کې په «من احب لقاءالله احب الله لقاءه» باب کې په کم بدلون سره له ابو موسی څخه روایت شوی، چې رسول الله صلی الله علیه وسلم وفرمایل:

«من أحب لقاء الله أحب الله لقاءه، ومن كره لقاء الله كره الله لقاءه»

ژباړه: هر څوک چې له الله سره لیدل خوښوي، الله هم ورسره لیدل خوښوي او هر څوک چې له الله سره لیدل نه خوښوي، الله هم له هغه سره لیدل نه خوښوي.

مومن پر هغو نعمتونو چې الله سبحانه وتعالی په جنت کې ورته برابر کړي او پر هغو بشارتونو چې رسول الله صلی الله علیه وسلم ورکړي، ایمان لري. پر همدغه اساس د الله سبحانه وتعالی د لیدو لېوالتیا لري او د ترلاسه کېدو لپاره یې بیړه کوي. په بدل کې یې الله سبحانه وتعالی هم د هغه د لیدو لېواله دی. خو کافر پر الله سبحانه وتعالی ایمان نه لري او پر هغه لوی عذاب باور نه لري، چې الله سبحانه وتعالی ورته تیار کړی دی. پر همدغه دلیل د الله سبحانه وتعالی د لیدو لېوال نه دی او د هغه لپاره بیړه نه کوي. الله سبحانه وتعالی هم د هغه لیدل نه خوښوي.

نن ورځ څومره کسان له موږ څخه د الله سبحانه وتعالی د لیدو لېوال دي؟ هغه څوک چې نېک عملونه ولري، د الله د لیدو لېوال دی. هغه څوک چې د الله سبحانه وتعالی د اوامرو د پلي کولو په لاره کې ثابت او ټینګ ولاړ وي، د الله سبحانه وتعالی د لیدو لېوال دی. هغه څوک چې موخه یې د الله سبحانه وتعالی او د رسول الله صلی الله علیه وسلم رضایت وي او هغه څوک چې د مسلمانانو چارو ته پاملرنه او رسېدګي کوي، د الله د لیدو لېوال دی.

هغه کس چې د ځمکې پر مخ د الله سبحانه وتعالی د احکامو د بیا پلي کېدو لپاره هڅه کوي، د الله د لیدو لېوال دی؛ هغه څوک چې دنیا ورته کوچنۍ او بې ارزښته ښکاري او خپل ځان د الله سبحانه وتعالی د رضایت د تر لاسه کولو په لار کې کوچنی ګڼي، د الله د لیدو لېوال دی؛ هغه کس چې د الهي ژمنې د پرځای کېدو په موخه د دویم راشده خلافت د تاسیس لپاره کار کوي یا د هغو کسانو ملګرتیا کوي چې په دې لاره کې فعالیت کوي، په حقیقت کې د الله د لیدو لېوال دی. نو اې هغو کسانو چې د الله د لیدو لېوال یئ، تاسو ته د الله د محبت زیری درکول کېږي!

اې ربه! د نبوت پر منهج راشده خلافت ژر راپه برخه کړه، چې په واسطه یې د مسلمانانو ستونزې او کړاوونه پای ته ورسېږي! اې ربه! په خپل کریم نور سره ځمکه روښانه کړه. مین!

ژباړه: بهیر «ویاړ»

(ژباړه)

عبدالله بن عمرو بن عاص رضی الله عنه له رسول الله صلی الله علیه وسلم څخه روایت کوي چې ویې فرمایل:

«يُوشِكُ أَنْ يَأْتِيَ زَمَانٌ يُغَرْبَلُ النَّاسُ فِيهِ غَرْبَلَةً، تَبْقَى حُثَالَةٌ مِنَ النَّاسِ، قَدْ مَرِجَتْ عُهُودُهُمْ وَأَمَانَاتُهُمْ وَاخْتَلَفُوا، فَكَانُوا هَكَذَا وَشَبَّكَ بَيْنَ أَصَابِعِهِ» (رواه ابوداود/3840)

ژباړه: ډېر ژر به هغه وخت راورسېږي چې خلک به غلبېل کېږي او کم ارزښته انسانان به پاتې کېږي، هغه چې عهد او میثاقونه یې ګډوډ شوي او په اختلاف کې راګېر شوي دي (د الله پیغمبر خپلې ګوتې له یو بل څخه تېرې کړې) او ویې فرمایل، د دغو ګوتو په څېر.

د شیخ عبدالمحسن بن حمد العَباد په حواله په شرح ابوداود کې راغلي: «يُغَرْبَلُ النَّاسُ فِيهِ غَرْبَلَةً» یعنې خلک امتحان او ازمویل کېږي، ترڅو نېک خلک له ناوړه خلکو څخه بېل شي او کم‌ارزښته انسانان د غنمو او اوړو د غلبېلولو پرمهال د هغو وښو او پوستکو په څېر دي، چې په غلبېل کې پاتې کېږي. خالص مواد لاندې تویېږي او پوستکي یې د غلبېل له سوریو نه وځي او پاتې کېږي. پر همدغه اساس هغه کسان چې پاتې کېږي، په حقیقت کې د ناخالصو موادو او د غنمو د پوستکو په څېر دي، چې د غلبېل له سوریو نشي وتلی او هېڅ خیر پکې نشته دی.

دغه تشبیه داسې کس کړې چې د نفس له هوا څخه نه دی غږېدلی، بلکې د امت اوسنی وضعیت یې په لنډ ډول بیان کړی دی. رسول الله صلی الله علیه وسلم د شام او هغو پېښو په اړه چې هلته رامنځته کېږي او همدارنګه د عراق، مصر، یمن، سوډان او نورو اسلامي خارو په اړه، چې اوسېدونکي یې خپل رب ته ژاړي او چیغې وهي، خبره کوي؛ هغه ځای چې امت د ابتلاء او ازمویښت په غلبېل کې غلبېلېږي او د خپل دین پر اساس امتحان او ازمویل کېږي، ترڅو د ایمان د مدعیانو هغه اصلي څېره بربنډه کړي، چې له دین څخه ناوړه استفاده کوي او د خپلو عایدو سرچینه یې ګڼي. همدارنګه د ټولو «خوږژبو» منافقینو رښتینی هویت څرګند کړي؛ لکه د اوبو پر سر هغه ځګ چې له منځه ځي او یوازې هغه څه پاتې کېږي چې خلکو ته ګټه لري.

هو نن ورځ واقعیت دا دی چې امت امتحان او ازمویل کېږي، ترڅو له هر ډول عیب او نیمګړتیا څخه پاک شي او چټلۍ او ناپاکۍ ورڅخه لرې شي؛ په دې توګه یوه پاکه او خالصه ډله پاتې شي او هغه مهال به پر دوی د الله سبحانه وتعالی نصرت او بریا نازله شي؛ ځکه د الله سبحانه وتعالی نصرت یوازې د پاکو او پرهېزګارو خلکو په برخه کېږي. نو اې د رسول الله صلی الله علیه وسلم امته! صبر غوره وکړئ، ځکه له تاسو سره د نصرت او خلافت ژمنه شوې ده.

اې ربه! موږ ته د نبوت پر منهج راشده خلافت راپه برخه کړه، چې په واسطه یې د مسلمانانو ستونزې او سختۍ حل او بلاوې او مصیبتونه ورڅخه لرې شي. اې ربه! په خپل کریم نور سره ځمکه روښانه کړه. اللهم آمین آمین!

ژباړه: بهیر «ویاړ»

په خیمو کې تر ټول‌وژنې وروسته به څه شی امت او د امت پوځونه په حرکت راولي!؟

(ژباړه)

د مې په ۲۷مه په غزه کې د روغتیا وزارت اعلان وکړ چې د رفح ښار د بې ځایه شویو پر کمپ د اشغالګرو یهودو په برید کې ۴۵ تنه وژل شوي، چې ۲۳ يې ښځې، ماشومان او سپین ږیري وو؛ د دې ترڅنګ ۲۴۹ تنه نو ټپیان دي. په خپرو شویو ویډیوګانو کې سوځېدلي جسدونه، له بدنونو پرې شوي سرونه، سوځېدلي زخمونه او د بدن پرې شوي غړي ښکاري. دغه نسل‌وژنه چې د « خیمې اور» په نوم یاده شوه په هغه سیمه کې پیښه شوه چې اشغالګرو یهودو د «امن سیمې» نوم ورکړی و. د اشغالګرو الوتکو پر هغو نویو بې ځایه شویو کمپونو بمبار وکړ چې د کډوالو لپاره د ملګرو ملتونو د مرستې او کار ادارې (UNRWA) ته څېرمه دېره شوي وو.

په غزه کې د یهودي رژیم د وحشتونو اتمه میاشت ده او دا ځل يې په نوې بڼه عام وژنه وکړه د ټولو انځوریزو او صوتي فلمونو سره سره نړیوالو هېڅ و نه کړل! بل وحشیانه برید یې پر ښځو او ماشومانو و چې په تېرو اتو میاشتو کې د یهودي رژیم د بریدونو «سټراتیژیک اهداف» ګڼل کیدل. پر خوندي سیمې د یهودي رژیم دغه نوي وحشتناک برید وښودله چې دغه اشغالګر رژیم د هېڅ خوندي سیمې او سرو کرښو پروا نه لري.

اې اسلامي امته: که د رفح او غزې پاتې کسانو د ژغورنې لپاره حرکت ونه کړئ د ماشومانو، ښځو او سپین ږیرو سوځېدلي جسدونه او وینې به په اخرت کې د الله پر وړاندي پر تاسو شاهدي وايي. ایا زموږ ګران پیغمبر موږ ته نه دي فرمايلي: «تَدَاعَى لَهُ سَائِرُ الْجَسَدِ بِالسَّهَرِ وَالْحُمَّى»... «مسلمانان د واحد تن په څیر دي که د بدن یو غړی يې په درد شي ټول بدن یې نارامه او تبه نیسي.»

نو ولې تاسو خپل ورونه دښمن ته یوازې پریږدئ!؟ تر کله به د دغو جنایتکارو لاسپوڅو رژیمونو، چې له یهودي رژیمه ساتنه کوي او د هغوی پر وړاندي هر خوځښت خنثی کوي، پر وړاندي چوپ وئ!؟

اې د مسلمانانو په پوځونو کې مخلصینو! موږ په ځانګړي ډول د مصر (الکنانه) پر سرتیرو، چې دغې نسل وژنې ته څېرمه پراته او هرڅه ویني او اوري او د اشغالګرو له لوري رامنځته شویو مصنوعي پولو څخه ساتنه کوي، غږ کوو. سهار او ماښام ښځې او ماشومان د مرستې لپاره پر تاسو غږ کوي خو تاسو دغو مصنوعي پولو او درزونو چې د اشغالګرو له لوري رامنځته شوي، راګرځولي یاست. اې سرتېرو او قومندانانو: نور بس دي، دغه حالت د زغم وړ نه دی. که دغه زړه بوږونکي پیښې تاسو په حرکت را نه ولي نو څه به مو په حرکت راولي!؟ موږ تاسو ته خبردارۍ درکوو که اوس تاسو په غزه کې د خپلو ورونو ملاتړ ونه کړئ، نو په اخرت کې د الله سبحانه وتعالی د غوسې او عذاب په تمه اوسئ. رسول الله صلی الله علیه وسلم فرمایلي دي:

 «مَا مِنْ امْرِئٍ يَخْذُلُ امْرَأً مُسْلِماً فِي مَوْضِعٍ تُنْتَهَكُ فِيهِ حُرْمَتُهُ وَيُنْتَقَصُ فِيهِ مِنْ عِرْضِهِ، إِلَّا خَذَلَهُ اللَّهُ فِي مَوْطِنٍ يُحِبُّ فِيهِ نُصْرَتَهُ، وَمَا مِنْ امْرِئٍ يَنْصُرُ مُسْلِماً فِي مَوْضِعٍ يُنْتَقَصُ فِيهِ مِنْ عِرْضِهِ وَيُنْتَهَكُ فِيهِ مِنْ حُرْمَتِهِ، إِلَّا نَصَرَهُ اللَّهُ فِي مَوْطِنٍ يُحِبُّ نُصْرَتَهُ»“

ژباړه: کوم څوک چې يو مسلمان په داسې ځای کې ذلت ته پرېږدي (مرسته يې و نه کړي) چې د هغه حرمت پکې تر پښو لاندې کېږي او بې ابرو کېږي، الله تعالی به هغه په داسې ځای کې ذليل کړي (مرسته به يې و نه کړي) چې دی پکې له هغه څخه د مرستې او ملاتړ هيله لري او کوم څوک چې په داسې ځای کې د يوه مسلمان مرسته او ملاتړ وکړي چې هغه پکې بې ابرو کېږي او حرمت يې تر پښو لاندې کېږي، نو الله تعالی به يې په داسې ځای کې مرسته او ملاتړ وکړي چې دی يې مرستې او ملاتړ ته هيله‌من وي.

نو ځانونه هغې ورځې ته چمتو کړئ چې له الله سبحانه وتعالی سره مخ کیږئ او ستاسو مدعي به د غزې یو ماشوم یا یوه ښځه وي چې وایې به: اې پرودګاره، دغو خلکو موږ یوازې پریښي وو، پداسې حال کې چې له موږ څخه د ملاتړ توان یې درلود!

د غزې پیښو د یهودي رژیم ډارنوالی او کمزوري ښکاره کړه؛ له دوی سره د جنایتکارانو د سرلارې امریکا، اروپا او د اسلامي خاورو حکامو کې د دوی د لاسپوڅو ملاتړ دی. نو د تېرو فاتحینو په څېر په فلسطین کې د خپلو مظلومو وروڼو او خویندو د ملاتړ لپاره راپورته شئ.

«وَيَوْمَئِذٍ يَفْرَحُ الْمُؤْمِنُونَ * بِنَصْرِ اللهِ يَنْصُرُ مَنْ يَشَاءُ وَهُوَ الْعَزِيزُ الرَّحِيمُ» [الروم:۴-۵]

ژباړه: «او په دغه ورځ به مومنان د الله په بښل شوي نصرت باندي خوشحاله شي. الله (سبحانه و تعالی) له هر هغه چا سره مرسته کوي چې خوښ یې شي، هغه (سبحانه و تعالی) برلاسی او رحیم دی.»

د حزب التحریر مرکزي مطبوعاتي دفتر – د ښځو برخه

۱۴۴۵هـ.ق کال، د ذوالحجې ۲۱مه

۲۰۲۴م کال، د مې ۲۹مه