(ژباړه)

پر صحيح مسلم باندې د نووي په شرح کې د "فإن تابوا وأقاموا الصلاة وآتوالزکواة فخلوا سبیلهم" تر باب لاندې په کم بدلون سره داسې راغلي:

له عبدالله بن عمر رضي الله عنه څخه روایت دی چې وایي: رسول الله صلی الله علیه وسلم وفرمایل:

«أمرت أن أقاتل الناس حتی یشهدوا أن لا إله إلا الله و أن محمدا رسول الله ویقیموا الصلاة ویؤتوا الزکاة فإذا فعلوا ذالک عصموا منی دماءهم وأموالهم إلا بحق الإسلام وحسابهم علی الله»

ژباړه: ماته امر شوی چې له خلکو سره تر هغه وجنګېږم، چې ووایي: لا إله إلا الله و أن محمدا رسول الله، لمونځ وکړي او زکات ورکړي! نو هر چا چې دا کارونه وکړل، نو ځانونه او مالونه يې له ما څخه خوندي کړل، مګر د اسلام په حق سره او حساب یې هم له الله سره دی.

دا چې رسول الله صلی الله علیه وسلم موږ ته په واضح ډول بیان کړي دي: «ما ته شوی چې له خلکو سره وجنګېږم، تر هغه چې ووایي؛ لا اله الا الله محمد رسول الله!» نو له کفارو سره مرسته مه کوئ او له هغوی سره ګډ ژوند مه کړئ! یعنې نه د ډیموکراسۍ په طریقه، نه د کلیسا په ډول، نه د قومیت په مفکوره، نه په وطني اړیکه، نه د دولت-ملت په چوکاټ کې، نه د تئوکراسي دولت په شکل او نه هم په هېڅ یوه طریقه!

هو، پر الله سوګند زموږ درد دا دی، چې کفر په داسې حال کې وینو، چې خپله جامه یې بدله کړې، د مسلمانانو منځ ته داخل شوی او د مسلمانانو د ژوند په ټولو برخو کې لاسوهنه کوي. زموږ په کورنیو، بازارونو، سرکونو، دود و دستور، رواجونو، جامو، خوراک، څښاک، ناستي، ولاړېدو، تګ، خبرو کولو، سکوت کولو، لیدلو، فکر کولو، مجلسونو او حتی زموږ په جوماتونو کې هم مداخله کوي. زموږ د ژوند ټولو چارو ته لاس غځوي او د هرې غونډې او دسیسې تر شا زموږ پر وړاندې را پورته کېږي!

 هو، زموږ درد دا دی چې دغه فاسق کفار زموږ تر منځ زموږ په جامه کې را څرګندېږي، زموږ په ژبه د قرآن خبرې کوي؛ په داسې حال کې چې تل د قرآن پر ضد جنګېږي! زموږ درد دا دی چې دوی د هغه مجلس په دننه کې چې د استازو مجلس یې بولي، وینو چې خبرې کوي او د امت پر ضد دسیسې جوړوي، نه د امت په ګټه! په الله قسم زموږ درد دا دی چې هغوی د سایکس-پیکو د معیارونو پر اساس د لوټمارو او لارشکوونکو په څېر را څرګندېږي او په هر ځای کې زموږ پر لاره کمین نیسي.

موږ نن ورځ له خپل ځان څخه پوښتنه کوو، ایا څوک شته چې په لوړ اواز چیغې کړي: «ما ته امر شوی چې له خلکو سره تر هغه وجنګېږم، چې ووایي؛ لا اله الا الله محمد رسول الله»؟ ایا نن ورځ مفاهیم او ارزښتونه بدل شوي دي، چې کفر په ټول فسق او فساد سره ځان د اسلام ځایناستی کړی دی؟

اې مسلمانانو! وروسته له هغه چې مسلمانانو خپل عزت، غوره‌والی، سیادت، نصرت، قدر او مقام، عظمت او دبدبه له لاسه ورکړي او د هغو کارونو له امله چې حکام یې ترسره کوي، مسلمانانو خپل دین پټ کړی او خجالت ورڅخه کوي؛ نو زموږ لپاره یوازې الله کافي دی او هغه د هرې ستونزې تر ټولو غوره حلوونکی دی. وروسته له دې چې مسلمانانو خپل مکلفیت چې نړیوالو ته د دین رسول دي، له یاده ایستلی، له داسې حالت سره مخ شوي، چې نه پوهېږي څه ډول له خپل دین څخه ساتنه وکړي!  نو اې د مسلمانانو خلیفه! څه وخت راځې چې په هسکه غاړه ټوله نړۍ مخاطبه کړې او ورته ووایې: اسلام راوړئ چې خوندي پاتې شئ!  له لوی رب او د عظیم عرش له څښتن څخه غواړو، چې دا ورځ ژر راورسېږي.

اې ربه، د نبوت پر منهج راشده خلافت ژر زموږ په برخه کړې، ترڅو د مسلمانانو درد ارام او له ظلم او تېري څخه یې خلاص کړي! اې ربه دا ځمکه دې د خپل رحم او کرم په نور منوره کړه! آمین آمین!