چهارشنبه/ ۲۰۱۸م، د سپتمبر ۲۶مه۱۴۳۹ه.ق، د محرم الحرام ۱۶مه
(ژباړه)
خبر:
ملګرو ملتونو په روهینګیا کې د مسلمانانو د یو نسل د له منځه تللو خبرداری ورکړی او وایي: «نیم میلیون انسانان په بنګله دېش کې د کډوالو په خیمو کې له ډول ډول خطرونو لکه په اوبو کې ډوبېدل او په بېلابېلو ناروغیو اخته کېدلو سره مخ دي. همدا اوس هم هغه څوک چې په میانمار کې استوګن دي، له زدکړې څخه وروسته پاتې دي. د میانمار د پوځیانو د وحشي بریدو له امله بنګله دېش ته د اراکان له ولایت (د میانمار شمال) څخه د ۷۰۰زرو روهینګیایانو له تګ څخه یو کال وروسته، اوس د ملګرو ملتونو، ماشومانو لپاره دفتر (یونسیف) د روهینګیایې ماشومانو راتلوونکې د بنګله دېش او میانمار د پولو دواړه لورو ته خطرناکه بولي. د یونیسف ویاند انګرام سایمون په سویس کې په یو مطبوعاتي کنفرانس کې ویلي، چې د روهینګیایي ماشومانو د یو بشپړ نسل د له منځه تللو وېره شته.
تبصره:
د کابو دوه میلیارده امت تر سترګو لاندې د مسلمان ماشوم نسل وژنه، د روهینګایي ورونو د پشپړ نسل د له منځ تللو وېره، د دې پر ځای کې د مسلمانانو له چارواکو څخه یو چارواکی د دغو مسلمانانو د نصرت او ژغورلو لپاره ګام پورته کړي، برعکس حتی د اسلامي خاورو دغه چارواکي په بې شرمۍ سره داسې د واک په ګدۍ ناست دي، چې ګواکې اسلامي امت په سوکالۍ او بشپړ امنیت کې ژوند تېروي. په داسې حالت کې د روهینګیایي وروڼو، ماشومانو، ښځو او سپین ږیرو د نصرت او مرستې لپاره د مسلمانانو چارواکو د نه راپورته کېدل دوه لاملونه لري:
۱. د مسلمانانو چارواکي د استعماري دولتونو د لوبو ابزار دي چې د خپلو بادارنو (انګلیس او امریکا) له خدمت پرته بل مسوولیت نه لري. له همدې امله د حیرانتیا ځای نه دی، چې هغوی د خپل همیشګي عادت غوندې د مسلمانانو د مرستې لپاره را پورته نه شي؛ ځکه په اصل کې هغوی د غربي دولتونو له خوا واک ته رسېدلي ترڅو په اسلامي خاورو کې پخواني استعمار ته قوت ورکړي او د پخواني واحد او ځواکمن دولت په شان د مسلمانانو د یوالي خنډ وګرځي، نو دغه چارواکي مزدوران دي، له همدې امله د رسول الله صلی الله علیه وسلم له امت سره که هغه لرې یا نږدې وي مرسته نه کوي.
۲. دویم لامل په خپله مسلمانانو پورې اړه لري چې د دغو مزدورو چارواکو له شر څخه د خلاصون لپاره ګام نه پورته کوي. همدا دلیل دی چې منکرات په خپل ځای پاتې دي، فساد ډېر شوی او مسلمان له مرستې وروسته پاتې دی. همدا د مسلمانانو درد او بلا ده چې پرې اخته دي. باید پوه شو چې هېڅکله هم د مسلمانانو حکام د امت د ژغورنې لپاره نه راپورته کېږي، ځکه هغوی مزدوران دي چې د غربي دولتونو خدمت کوي، خو موږ مسلمانان به تر څه وخته په داسې حالت کې و او ناخبره فعالیت به کوو، داسې فعالیتونه چې پایله یې بېړنۍ مرګ وي؟!
اوس د دې وخت رارسېدلی چې اسلامي امت د دغو خاینو چاروکو او د غرب د جاسوسو موسسو له حاکمیت څخه چې د رسول الله صلی الله علیه وسلم د دوه ملیارده امت د له منځه وړلو لپاره ګومارل شوي، ځان خلاص کړي. له نېکه مرغه هغه تګلاره چې زموږ پروردګار موږ ته له دغو ستونزو څخه د خلاصون لپاره رالېږلې، په هغې کې د ټولو ستونزو دوا او شفا پرته ده، زموږ په منځ کې په تازه ډول شتون لري او حزب التحریر د کفارو او د هغوی د مزدورانو له شر څخه د امت د خلاصون لپاره په الهي تګلاره باندې د منګلو لګولو څرنګوالی په روښانه ډول ښودلی دی. نو باید له الله سبحانه وتعالی څخه ووېرېږو او د ځان، روهینګیایي ماشومانو او ټولو مظلومو مسلمانو د خلاصون لپاره کار وکړو.
د خبر او تبصرې د مطبوعاتي خپرونو له پاڼې څخه اخیستل شوې
لیکوال: دکتور فرج ممدوح
(ژباړه)
خبر:
«عرب نیو» خبري اژانس د روان کال د سپټمبر پر ۱۶مه د صهیب الاسلم د مړینې د مراسمو په اړه راپور خپور کړ. هغه ځوان چې د یهودو د دولت سرتیرو له لوري د اګېسټ پر درېیمه په غرب خان یونس کې وویشتل شو. نوموړي له څو اونیو رنځ او ټپ وروسته ساه ورکړه. دغه ځوان داسې وخت مړ شو چې د یهود دولت د سرتیرو له لوري په خان یونس او د غزې په سویلي برخې د جبلیې په ختیځ کې د دوو نورو فلسطینیانو د مرګ یوازې څو ورځې تېریږي.
تبصره:
په نړۍ کې په میلیونونه ماشومان نوی کال په هیلو، بریاوو او پرمختګونو پیلوي، په داسې حال کې چې فلسطینې پلرونه او میندې د خپلو هغو زامنو د جنازې په مراسمو کې ګډون کوي چې هره ورځ د صهیونیستي دولت تر وحشتناک ظلم لاندې شپې او ورځې تېروي. په خپلواک ژوند او د ماشومانو لپاره د ښونې په حق پورې اړوند د بشري حقونو ټول نړیوال قوانین له ظلم او تیري پرته، دغه ټول قوانین د مهاجرینو په کمپونونو او د فلسطین په زندانونو کې پر مسلمانو ځوانانو نه پلي کېږي؛ چې هغوی دغه کمپونه او زندانونه په واک کې لري. په هغه روغتون کې چې د صهیب درملنه کېده، ډاکتران شکایت کوي چې د سون توکو لږېدل د روغتون د بشپړ ویجاړېدو مانا لري. غزې ته پر سرچینو بندیز دا مانا لري چې که څوک روغتیایي مرستو ته اړتیا ولري، دغه ډاډ به نه وي چې غوره امکانات یې دې په لاس ورشي. دغه ډېر لوی اختلافونه دي چې یهود دې په سیمه کې تر ټولو غوره امکاناتو او تخصص ته لاس رسی ولري؛ پر هغو جنایتونو سربېره چې د مسلمانانو په حق کې یې تر سره کوي. اسوشیټډ پرېس خبر ورکړی چې د ۱۵ کلن مصطفی عابد د جنازې په مراسمو کې د نوموړي د کورنۍ غړو او په سلګونه خپلوانو ګډون وکړ. پر دغه ځوان د یهودو د دولت له لوري اوښکې بهونکي ګاز وکارول شول او سخت یې ټپي کړی و.
د مصطفی دولس کلن ملګري محمد د مهاجرینو له کمپ څخه ویلي کله چې نوموړی ټپي شو، دی ورسره و. دغه کړنه دا ښيي چې څه ډول زموږ ځوانان په لومړۍ کرښه کې د جنایت کوونکي دولت پر وړاندې مبارزه کوي. په ډاډ سره باید ووایو چې د اسلامي نړۍ مشران باید د هغو ځواکونو د مخنیوي له امله محاسبه شي چې له مسلمانانو څخه ملاتړ او دفاع ته اجازه نه ورکوي. په داسې حال کې چې دغه مسلمانان له ایمان او تر پښو لاندې تیږو پرته د بل چا دفاع له ځان سره لري. کال په کال موږ په رهبرۍ کې داسې بدلونونه وینو چې په سیمه کې یې د غیر اسلامي حکومت د ساتلو لپاره له غربي دولتونو سره تړون کړی او د قدرت او شتمنۍ پر وړاندې د مسلمانو مېرمنو او ماشومانو وینه پلوري. د مسلمانانو نړیواله ټولنه، چې د دغو جنایتونو د ښکاره کولو او خبرو وړتیا لري، باید چوپ پاتې نه شي. که زموږ له خویندو او وروڼو څخه ناوړه ګټه اخیستل کېږي، باید پر دغو جنایتونو سترګې پټې نه شي.
د سیاسي اصلاحاتو لپاره له دوه برابره معیارونو پرته کله چې رسنۍ د یهودو د شتون په اړه هر نظر غندي، موږ باید د حقیقت لپاره له الله سبحانه وتعالی سره اخلاص ولرو چې په دې کې لوی ثواب نغښتی دی. هېڅکله باید داسې کسان نه شو چې له بې ګناه خلکو سره جنایت وکړو. الله سبحانه وتعالی فرمایي:
﴿يَٰٓأَيُّهَا ٱلَّذِينَ ءَامَنُوا ٱتَّقُوا ٱللَّهَ وَقُولُوا قَوْلًا سَدِيدا﴾
[احزاب: ٧۰]
ژباړه: اې هغو کسانو چې ایمان مو راوړی! له الله سبحانه وتعالی څخه ووېرېږئ او رښتیا خبره وکړئ.
ټول مسلمانانو باید زموږ له ځوانانو څخه چې د دغه ظالم رژیم له لوري ظلم پرې کېږي، باید یو ځای شي؛ هغه رژیم چې په کتابونو او د یوې نظریې په کچه د اسلامي سیاست ساتلو هڅې کوي. موږ ټول باید د ځوانانو لپاره د یو امن راتلونکي لپاره د خلافت نظام د لارښوونې او ساتنې لپاره هڅې وکړو. هغه نظام چې زموږ د زرګونه ځوانانو خښول به ونه زغمي، بلکې بریالیتوب او عزت ته د رسېدو لپاره به زمینه ورته برابره کړي. د داسې یو نظام تر چتر لاندې چې د بهرني قدرت لپاره به کار نه کوي، بلکې په اسلامي ارزښتونو سره به د عدالت د ټینګېدو لپاره داسې هڅې وکړي، څرنګه چې الله سبحانه وتعالی امر کړی.
لیکوال: عمرانه محمد
د حزب التحریر د مرکزي مطبوعاتي دفتر غړی
ژباړه: بهیر «ویاړ»
وړاندې کوونکی: شیخ یوسف مخازره (ابو همام)- مبارکه خاوره (فلسطین)
۱۴۴۰ه.ق، د محرام الحرام ۱۸مه، جمعه/ ۲۰۱۸م، د سپتمبر ۲۸مه
د ادلب په حومه، اکمونه کمپ کې د استاد احمد القاصر د جمعې ورځې د خطبې یوه برخه
۱۴۴۰ه.ق، د محرم الحرام ۱۸مه، د سپتمبر ۲۸مه
(ژباړه)
امریکا اسلامي حرکتونه او په اسلامي خاورو کې هغه اغېزمن کسان، چې د دوی له نفوذ څخه ناراض دي، په پوره توګه پېژني. امریکا هڅه کوي چې دا ډلې واک ته ونه رسيږي، ځکه دا حرکتونه غواړي له اسلامي خاورو څخه د امریکا نفوذ په محدوده مانا نه؛ بلکې له ټولو اسلامي خاورو څخه په پوره مانا پاک کړي. دغه راز امریکا پوهیږي، چې داسې حرکتونه هم شته، چې له دوی سره یې د تعامل امکان شته او امریکا هم غواړي دغه حرکتونه واک ته ورسيږي او د دموکراسۍ په لوبه کې شریک وي. امریکا د خپلو ګټو لپاره د هغه حزبونو او سیاسیونو د بریالیتوب هڅه کوي، چې ځانونه په دین پورې تړي، البته هغه دین پورې چې له دیموکراسۍ سره سمون لري او د افراطګرایۍ (واقعي اسلام) ضد دی.
امریکا غواړي خپل نفوذ د هغو اسلامي حرکتونو له لارې، چې له امریکایي سیاستوالو سره اړیکې لري پراخ کړي؛ هغه اسلامي حرکتونه چې د دې پرله پسې کتنو د خطرناکه پایلو په مسیر نه پوهیږي. امریکا په خپل خبیث سیاست او چلاکۍ سره اردوغان او دا حرکتونه په خپل چوپړ کې کړي او غواړي ددغو ډلو په وسیله خپلو موخو ته ورسیږي. هغه اردوغان چې د حل لار او سوله یوازې خبرې ګڼي، له همدې امله اردوغان د امریکا له سیاسیتوالو سره په اوږدو او پرله پسې کتنو کې اساسي رول درلود، هغه څه چې په حقیقت کې یې په ترکیه کې د امریکا نفوذ ځواکمن کړ.
مخکې له دې چې هېلري کلنټون د امریکا د بهرنیو چارو وزیره شي، هغه وخت چې اردوغان د استانبول ښاروال و، په نهمه لسیزه کې یې اردوغان داسې وستایه: «زما په اند اردوغان یو هڅاند سیاسي شخصیت، ځواکمن او صادق انسان دی.»
له امریکا سره د اردوغان پرله پسې کتنې ددې لامل شوې، چې د ۲۰۰۲م په پارلماني ټاکنو کې د ده ملاتړ وکړي. هیلري کلنټون له اردوغان سره یوازې د داود اوغلو په شتون کې ـچې د پوهنتون استاد او د دوی ژباړن وـ ساعتونه ساعتونه خبرې او کتنې وکړې، چې وروسته بیا د اردوغان په واکمنۍ کې داود اغلو د ترکیې د بهرنیو چارو د وزیر په توګه وګمارل شو. دا کتنې د امریکا او ترکیې تر منځ د مثبتو او ښو اړیکو لامل شوې او ددغو دوو هېوادونو دوستانه اړیکې یې زیاتې کړې. کله چې هلیري کلنټون د امریکا د بهرنیو چارو وزیره شوه، له اروپا، اردوغان، عبدالله ګل او د ترکیې له مشرانو سره یې لېده کاته وکړل. کلنټون وتوانېده، پر خلکو د اغېزې په موخه د ترکیې د یوه تلوېزیون په مشهوره او د ډېرو مینوالو لرونکو خپرونه (راشه له موږ سره یوځای شه) کې، څرګنده شي؛ هغه څه کې چې حکومتونو ته لوی سیاسي پوښښ ورکوي.
امریکایانو د ترکیي په ټاکنو کې د اردوغان د بریا لپاره منظم پلان جوړ کړ او اقتصاد یې د مخکیني حکومت د ماتې یوه لار وګڼله او په ترکیه کې یې د امریکا د قدرت د نفوذ لپاره یو لړ کارونه وکړل لکه، د پوځیانو لرې کول او د اردوغان د حزب د ټاکنیزو مبارزو ستاینه. ستیفن کتنزر اردوغان وستایلو او ویې ویل: «هغه خپل عقل د هېواد په سطحه په سیاسي سیالیو او نظم کې په ډاګه کړ؛ هغه څه چې تر اوسه په ترکیه کې هېڅ سیکولري حزب نه دي کړي.» همداراز د عدالت او پرمختیا حزب په پارلماني ټاکنو کې د ټاکنیزو مبارزو له پیله تر بریالیتوبه ښځو ته اساسي رول ورکړ. ستیفن کتنزر اردوغان او ملګري یې منځلاري اسلامپال وبلل.
اردوغان له خپل بریالیتوب وروسته د ترکیې د ملي امنیت شورای، چې له داسې جنرالانو جوړه وه چې د حکومت پر مشرانو یې تسلط درلود، په داسې شورای بدله کړه، چې ښاریان یې اداره کوي. همداراز اردوغان ځینې نور کارونه هم وکړل، چې له ترکیې څخه د انګلیس د لرې کولو نیت روښانوي. لکه، د اعدام د جزا لغوه کول او د بشري حقونو اړوندو قوانینو او سخت دریځو قوانینو تعدیل؛ خو حقیقت دا دی: اردوغان جنرالان له قدرت څخه ګوښه کړل، حکومت یې له دروغجن انقلاب وروسته سختدریځه اقدامونه وکړل او د پخوانیو حکومتونو په پرتله یې قدرت په لاس کې واخیست. په ۲۰۱۶م کې وروستنی انقلاب د اردوغان لپاره فرصت و، چې نظام د انګلیس له اجیرانو پاک او پر ځای یې د امریکا مهرې(لاسپوڅي) ځای پرځای کړي او دا چاڼ تر اوسه دوام لري.
ترکیه د یوه سیمهییز قدرت په توګه را څرګنده شوه او په پایله کې لازمه وه، خپل هغه رول، چې د امریکا لخوا ورکړل شوی و، تر سره کړي. نو اردوغان د امریکا ډېر بهرني سیاستونه کامیاب کړل. دا هغه رول و چې امریکا له ترکیې وغوښت او ترکیې یې په سرته رسولو سره امریکا راضي کړه.
کله چې امریکا په ۲۰۰۳م کې عراق اشغال کړ او د خلکو ذهنونه یې د دیموکراسۍ په لوري جلب کړل، د عراق غربځپلو خلکو د دیموکراسۍ ملاتړ وکړ. هغه کسان چې له امریکا سره د عراق په نیولو کې همکار او ملاتړي وو. خو د دې لپاره چې په عراق کې د دیموکراسۍ لوبه پوره شي، امریکا د ټولو ښکېلو اړخونو ګډون ته اړتیا درلوده؛ ځکه چې امریکا ونه شوای کړای د عراق پر ټولو وګړو دیموکراسي ومني. کله چې د عراق اهل سنتو د عراق ملي ټاکنې رد کړې، نو ترکیه وتوانېده د دوی نظر بدل کړي او په نظام کې یې ګډون ته قانع کړي. دا هغه څه و چې امریکا غوښتل، خو کولای یې نه شوای.
دا د منلو نه ده، چې په ۲۰۰۷م کې شمعون پرېز د ترکیې د پارلمان مخې ته ودرېد او په عبراني ژبه یې وویل: «ترکیه د باور وړ ده. زه راغلم، چې مننه ترې وکړم.» د هغو خبرو اترو په اوج کې چې امریکا په ۱۹۷۸م کې د دیوید په کمپ کې د مصر او یهودو د رژیم تر منځ، په ۱۹۹۱م کې په مادرېد کې د یهودو غاصب رژیم، فلسطین او د فلسطین ازادي بښونکي سازمان تر منځ وکړې. دغه راز په ۱۹۹۴م کې د یهودو د دولت او اردن تر منځ د عربه سیمې هوکړه لیک رامنځته شو. سوريې دا مذاکرات ونه منل. که څه هم دا خبرې اترې د امریکا لخوا جوړې شوې وې. کله چې د یهودو دولت له سوریې سره پټې خبرې اترې پیل کړې، له ترکیې یې د تنظیم غوښتنه وکړه، دا هغه رول و، چې لا یې هم امریکا له اردوغان څخه د یهودو او حماس تر منځّ په خبرو اترو کې غواړي.
کله چې امریکا د ترورېزم په نامه د اسلام پر وړاندې جګړه پیل کړه، ځینې نور غربي هېوادونه هم ورسره مله وو، چې مسلمانان یې له دین څخه لرې او غیر ما انزل الله واک ته ورسوي، نو اړتیا یې پیداکړه، چې د اسلامي خارو حاکمان هم له ځان سره ولري، نو اردوغان دغه رول تر سره کړ او ترکیې په څلورو کلونو کې ثابته کړه، چې د امریکا وفاداره ملګرې ده. هیلري کلنټون په پوره ډاډ سره وویل: «موږ او ترکیې په افغانستان، سوریې او نورو ځایونو کې له ترورېزم سره په ښه توګه مبارزه وکړه.» تر ټولو ناوړه رول، چې اردوغان د امریکا په ګټه تر سره کړ، هغه له ۲۰۱۱م نه تر اوسه د بشاراسد (د امریکا مزدور) ساتنه او د هغه د ځواکونو تیتول د ازادې اردو تر سرلیک لاندې، د سپر فرات د عملیاتو لپاره و، چې بشاراسد ته یې پر حلب د تسلط فرصت ورکړ. دغه راز د زیتون څانګې عملیاتو بشاراسد ته فرصت ورکړ، چې شرقي غوطې ته دننه شي.کاش! امریکا ته د اردوغان چاپلوسي او مزدوري همدومره وای؛ له بده مرغه د امریکا په ګټه د اردوغان خیانتونه او پوځي عملیات تر دې لوړ دي.
اردوغان په ټول ځواک سره مسلمانان سیکولرېزم ته رابولي. دا هغه رول دی، چې د امریکا لخوا ورته سپارل شوی. امریکا غواړي ترکیه او اردوغان په اسلامي نړۍ کې الګو وي.
داود اوغلو د اسلامي امت قضیو ته لکه: د یهودو دولت لخوا د فلسطین اشغال، د روسیې لخوا د چیچین اشغال او د امریکا لخوا د افغانستان او عراق اشغال او دغو ستونزو ته د اسلامي حلارې په وړاندې کولو کې پاتې راغی. دغو قضیو ته یې د نړیوالو قوانینو له زاویې وکتل، چې دې کتنو یې ډېرې ستونزې او ناهیلۍ جوړې کړې. په داسې حال کې چې داود اوغلو پوهيږي، چې مسلمانانو د اسلامي خاورو مزدورو دولتونو پر وړاندې خپلې هیلې له لاسه ورکړي. نو له خلکو یې وغوښتل چې د سیاسي، اقتصادي او ټولنیزو ستونزو د حل لار پیداکړي. دغه راز اوغلو له اسلامي خاورو غواړي، چې ترکیې ته د ستونزو د حللارې د معجزې او اسلامي خلافت په سترګه وګوري. په داسې حال کې چې د ترکیې په اړوند داسې واقعیت هېڅ نشته.
عقلمند مسلمانان پوهیږي، چې عثماني خلافت نشته. هغه څه چې ترکیه یې ادعا کوي اصلاً له عثماني خلافت سره تړاو نه لري. ترکیه د امریکا غلامه او د هغې سیاستونو ته تسلیم ده؛ هغو سیاستونو ته، چې مسلمانان ترې نفرت لري. په هر هغه ځای کې چې امریکا ونه شوای کړای، خپل سیاست او پوځي حکومتداري پلې کړي، نو ترکي مسوولین یې هغه ځای ته واستول او د ترکانو په وسیله د دوی پر مخ د خبرو اترو دروازې پرانیستل شوې، لکه په لبنان، پاکستان او افغانستان کې.
ترکیې د امریکا رول په داسې توګه لوبولی، چې ته به وایې دا هېواد په خپلو سیاستونو کې خپلواک دی، په سیاستونو کې یې د هېڅ هېواد لاس نشته؛ خو حقیقت بل څه دی. ترکیې د اوزال په وخت کې د کردانو د ګټو د ورکړې په پار اعلان وکړ، چې نیمایي دې کرد وي. وروسته له هغه د ګاونډیانو ګټې د اردوغان په وخت کې په پام کې ونیول شوې، هغه څه چې فکر کېږي سوله راوړي. احمد داود اوغلو هغه ته د «ستراتیژیک عمق» نوم ورکړ. ترکیې خپل لومړنی پلان پر ګاونډیانوـ هغو کسانو چې له ترکیې سره یې اختلاف درلودـ پلی کړ. چې په دې پلان کې تر ډېره بریالۍ هم شوه. ترکیې نه یوازې له ګاونډیانو سره د ستونزو د حل غږ پورته کړ؛ بلکې د دې په لټه کې شوه، چې د ګاونډي هېوادونو په داخل کې باید ستونزې حل شي. دلیل یې دا و، چې د ترکیې په څنګ کې اختلافونه، سوله ګواښي، د سیمه ییز پرمختګ لارې له منځه وړي او دا ټول په راتلونکې کې د ترکیې د تشویش لامل ګرځي.
اردوغان ترکیه د انګلیس له کندې را واېسته؛ خو د امریکا په کنده کې یې ډوب کړه، نو ګټه څه ده؟ له ۱۹۲۴م نه تر اوسه د ترکیې ۷۸ کاله عمر بې ګټې تېر شو. له هغه وخته چې مصطفی کمال خلافت لغوه او جمهوریت یې اعلان کړ. اوس شپاړس کاله کېږي، چې امریکایانو د ترکیې هویت لوټ کړی. امریکایانو د اردوغان د بریا لپاره د ترکیې اقتصاد لوړ کړ. له همدې کبله د ترکیې اقتصاد پیاوړی او په نړۍ کې یوه نمونه ګرځېدلی. خو روښانه واقعیت دادی، چې د اردوغان او د هغه د حزب له بریا وروسته، دا یونیم کال د هغه د ناوړه اقتصادي پلانونو په مقابل کې ترکان مقابله کوي او د ترکیې قرضونه د هغې اقتصادي ماتې ښیي.
له شک پرته، په ترکیه کې مسلمانان پوهیږي، چې د امریکا او د هغې د مزدورانو د غوښتنو له پوره کېدو پرته کوم بل بریالیتوب نه دی رامنځته شوی؛ خو د منهج پر نبووت د راشده خلافت د سهار وړانګې نیږدې دي.
سرچینې:
۱-کلینټون، هیلري. خیارات صعبة. کاغذي چاپ
۲-کنزر، ستیفن.العودة الی الصفر. برېښنایي چاپ
له الرایه جریدې څخه
لیکوال: شفیق خمیس
ژباړن: حبیب الله
د ۲۰۱۸م کال د سپټمبر پر۷ د شام هوډمن خلک د جمعې د لمانځه تر اداینې وروسته، د لاریونونو په موخه لارو او کوڅو ته را ووتل. د دوی دا حرکت د دې څرګندونه کوي، چې د دوی په سینو کې لا د پاڅون لمبې بلې دي او نه دي مړې شوي او د غرونو په څېر ټینګې او ثابتې پاتې دي.
له شکه پرته داسې خوځښتونه د عامه رایې په رهبري کې خورا اهمیت لري او ان د ظالمو رژیمونو په ملاتړ یا له منځه وړلو کې ستر رول لوبوي. په دمشق کې د شام پاڅون د سپېڅلې انګېزې پر بنسټ د لاسپوڅي رژیم پر وړاندې راپورته شو. دغه پاڅون د رژیم مشروعیت له منځه یووړ او ان د دغه رژیم ستنې يې ولړزولې، له دې امله نړیواله ټولنه وهڅېدله چې د لاسپوڅي جنایتکاره رژیم د ملاتړ لپاره په دمشق کې لاس په کار شي او رژیم ته یو ځل بیا مشروعیت ور په برخه کړي. د نړۍ سترو هیوادونو له کلونو راهیسې د شام پاڅون پر وړاندې دسیسې جوړولې، څو د خپلو نه ستړې کېدونکو هڅو پر مټ نوموړی پاڅون اداره او لوری یې ور بدل کړي.
دا له چا پټه پاتې نه ده، چې د شام پاڅون هم په نظامي او هم په ټولنیزه برخه کې له ماتې او زیانونو سره مخ شو، ځکه خپلې پرېکړې یې په نړیوالې ټولنې او ملاتړ کوونکو هیوادونو پورې وتړلې، چې له امله یې د پاڅوانوالو پرېکړې محدودې شوې، لوری یې بدل شو او پاڅون وال يې دې ته اړ کړل، چې له خپلو ځینو اساسي غوښتنو تېر شي. په پایله کې پاڅوانوال ناهیلي شول او جنایتکاره رژیم وژغول شو.
د یوه نوي عمومي خوځښت لپاره دا اړینه وه چې په پوره پاملرنې سره یې ګام اخستی وای، د هغو تباه کوونکو خطاګانو له بیا ځلې تکرار څخه یې ډډه کړې وای چې په تېر کې يې ترسره کړې وې، په سوریه کې د ښکېلو هیوادونو په ګټه د پرېکړو په اړه خبر وای یا د هغو غوښتنو، موخو یا شعارونو په اړه یې پوهاوی لرلی چې د دغو هیوادونو له لوري پر مخ وړل کېږي.
له دې امله نوی خوځښت باید خپل ځان اصلي موخې ته له انحراف څخه وژغوري، ترڅو د شام وګړي خپلې سترې سرښندنې او قربانۍ له لاسه ور نه کړي. هغه څو ټکي چې د یو خوځښت او پاڅون په پیاوړتیا کې مرسته کوي، په لاندې ډول یې بیانوو:
۱: د یوه څرګند پلان او پروژې شتون اړین دی، چې پر مټ یې خلک یو موټي شي. نوموړی پلان باید د دوی له عقیدې سره سم غوره شي، څو دوی یووالي ته وهڅوي، خبره یې یوه کړي او موخې یې څرګندې کړي. د محاسبې لپاره داسې معیار غوره شي چې پر بنسټ یې هیڅوک د دې توان و نه لري چې د خوځښت له موخو څخه مخ واړوي یا یې لوری بدل کړي.
۲: د پاڅون لپاره اړینه ده چې په راس کې له یو هوښیار او رښتینې سیاسي مشرتابه څخه برخمن وي، ترڅو کړنې یې د موخو په ترلاسه کولو کې اغېزمنې ثابتې شي او له عملي پلوه یې پلان او پروژه د یو نظام په اډانه کې پلې شي.
۳: د پاڅوانوالو لپاره اړینه ده چې د پاڅون اصول (اساسات) په کلکه عملي کړي، چې د اوږدې مبارزې په ترڅ کې یې اصول خورا څرګند دي او هغه دا دي، چې د اوسني رژیم سټه او جرړې به له بېخه لرې کوي، له هغو ملاتړو هیوادونو سره به اړیکې پرې کوي، چې په وینا یې د پاڅون مرسته کوونکي ګڼل کېږي او پر ځای به يې له نبوي طریقې سره سم راشده خلافت رامنځته کوي.
دا خبره روښانه ده، چې پاڅون اوس هم رغنده رول لري او له مصونیت څخه برخمن دی، هیڅوک به ونه شي کولی چې نامشروع ګټه ورڅخه واخلي یا یې له خپلې کړنلارې څخه لوری بدل کړي، ځکه د خپلو بنسټیزو اصولو پر بنسټ د موخو ترلاسه کولو لپاره یې په پرله پسې توګه هڅې نه بدلېدونکې دي.
ښکېلاکي کفري هیوادونو یو په بل پسې د شام د رښتیني ولس او پاڅون پر وړاندې سترې دسیسې جوړې کړې دي. موږ یې باید په اړه خبر وو، ترڅو له پوره چمتوالي سره یې په لومه کې ونه نښلو، د ستر رب پر قانون منګولې خښي کړو، پر ستر رب توکل وکړو او پر خپلو سپېڅلو موخو کلک پاتې شو. په همدې کې زمونږ لپاره خلاصون، آزادي او بریا شته.
الله تعالی فرمايي:
﴿وَقَدْ مَكَرُوا مَكْرَهُمْ وَعِندَ اللَّهِ مَكْرُهُمْ وَإِن كَانَ مَكْرُهُمْ لِتَزُولَ مِنْهُ الْجِبَالُ فَلَا تَحْسَبَنَّ اللَّهَ مُخْلِفَ وَعْدِهِ رُسُلَهُ إِنَّ اللَّهَ عَزِيزٌ ذُو انتِقَامٍ﴾
[ ابراهیم:۴۶-۴۷]
ژباړه: هغوی خپلې ټولې دسیسې وکارولې، خو د هغوی د هرې دسیسې له منځه وړل له الله سره دي؛ سره له دې چې د هغوی چلونه دومره پیاوړي دي چې غرونه پرې له ځایه بې ځایه کېږي. نو اې پېغمبره! ته هیڅکله دا ګومان مه کوه چې الله به له خپلو پېغمبرانو سره د کړو وعدو پر خلاف کار وکړي. الله برلاسی او غچ اخستونکی دی.
د حزب التحریر- ولایه سوریې د مطبوعاتي دفتر مشر
احمد عبدالوهاب
ژباړن: حمزه خالد
د جهاد پوښتنه:
السلام عليکم
بخښنه غواړم، د مصعب ابن عمیر د طلب النصرې په تړاو څه ثبوت شته، هغه مهال چې يوازې یې په مدينه کې دعوت مخ ته وړی؟ هيله لرم چې قانع کوونکی ځواب ترلاسه کړم.
د عطیه جبرین پوښتنه:
زموږ امیر او شیخ ابو یاسین!
اسلام علیکم ورحمة الله و برکاته
د طلب النصرې د موضوع په اړه د یوې پوښتنې په ځواب کې راغلي دي (هغه څوک چې بری ځنډوي او يا يې پرېږدي) او (... يا دا چې ایا د طلب النصرې په برخه کې مصعب ابن عمیر تر رسول الله صلی الله عليه وسلم زیاته هڅه کوله؟ او همدارنګه راغلي دي چې (... رسول الله صلی الله عليه و سلم په لسګونو ځله د طلب النصرې غوښتنه وکړه، خو مثبت ځواب يې ترلاسه نه کړ، په داسې حال کې چې ده صلی الله عليه وسلم خپل رسالت په ډېره غوره طريقه مخ ته وړی... خو مصعب رضي الله عنه مثبت ځواب ترلاسه کړ...)
شيخ صاحب! ته کولی شې موږ ته هغه شواهد او ثبوت وړاندې کړې، چې مصعب ابن عمیر رضي الله عنه د مدينې له خلکو د طلب النصرې غوښتنه کړې ده، ځکه موږ د سيرت له کتابونو او شيخ تقي الدين نبهاني د اسلامي نظام کتاب له لوستلو وروسته پوه شو، چې مصعب ابن عمیر خلک اسلام ته رابلل او موږ هغه څه نه دي لوستي، چې ګواکې ده د دين لپاره طلب النصره کړې وي. الله دې برکت درکړي، موږ او تا دې الله سبحانه و تعالی د اسلامي نظام په ژر راتګ سره یو ځای کړي.
ځواب:
وعليکم سلام ورحمته الله وبرکاته
ستاسو دواړو پوښتنې سره ورته دي او ځواب يې په لاندې ډول دی:
۱- زه يادې پوښتنې حيران کړم، تاسې دواړه هغه ثبوتونه غواړۍ چې مصعب رضي الله عنه په مدينه کې د طلب النصرې غوښتنه کوله، په داسې حال کې چې دی د جِهاد ورور له وينا سره سم په مدينه کې دعوتګر و! يا د عطیه ورور له پوښتنې سره سم یې خلک اسلام ته رابلل! ايا همداسې ده؟! ايا طلب النصره له دعوت سره توپير لري؟ ايا طلب النصره اسلامي دعوت نه دی؟
یو دعوتګر خلک، د خلکو په منځ کې عامه رايه، د ځواک او دفاع څښتنان اسلام ته رابولي. مصعب ابن عمیر رضي الله عنه عام وګړي اسلام ته رابلل او د ځواک او دفاع څښتنان يې هم اسلام ته رابلل او هم یې ترې د طلب النصرې غوښتنه کوله. وروسته تر دې چې رسول الله صلی الله عليه وسلم ته د پیاوړي او برلاسي الله سبحانه و تعالی له لوري امر وشو، چې طلب النصره وکړي. دی صلی الله عليه وسلم د ځواک او دفاع د خاوندانو قومي مشرانو ته ورغی او هغوی يې اسلام ته را وبلل. هغو مشرانو چې مثبت ځواب يې ورکاوه، نو ده صلی الله عليه وسلم به له نوموړو څخه د طلب النصرې غوښتنه کوله. که به قومي مشر د ځواک او دفاع څښتن نه و او له عامو خلکو څخه به و يا به يې قوم کوچنی و او ځواک او دفاع به يې نه درلوده، رسول الله صلی الله عليه وسلم به اسلام ته راباله او د طلب النصرې غوښتنه به يې نه ترې کوله.
۲- دغه کار د مصعب ابن عمیر رضي الله عنه و؛ چې ده د مدينې خلک اسلام ته رابلل، قرآن يې تر هغه مهاله تدريسوو چې اسلام خپور شي او مصعب به رسول الله صلی الله عليه وسلم ته ويل، چې اسلام هر کور ته لاره موندلې او د هر کور يو شمېر خلک په اسلام مشرف شوي دي، یعنې مسلمانان د شمېر له پلوه ډېر شوي دي. خو د ځواک او دفاع څښتنان د ګوتو په شمار دي: ۷۳ نارينه او دوې ښځې دي. کله چې مصعب رضي الله عنه وتوانید چې ملاتړ ترلاسه کړي، نو د بعثت په ۱۱کال رسول الله صلی الله عليه وسلم ته ورغی او هغه صلی الله عليه وسلم ته یې وړاندیز وکړ، چې د ځواک او دفاع خاوندان باید له تاسره د بعثت په ۱۲ کال ناسته وکړي، ترڅو دوی ته د طلب النصرې اړوند خپل شرطونه وړاندې کړې، ځکه دا کسان چمتو وو.
۳- زه هغه څه چې د اسلامي نظام په کتاب کې په دې تړاو ترې يادونه شوې، تاسو ته رانقلوم:
«... کله چې د حج موسم راغی، دی مکې ته ولاړ او د الله رسول ته یې یو ځل بیا په مدینه کې د مسلمانانو د شمېر په اړه، د دوی د ټوکېدونکي ځواک، د اسلام او په بېړه یې د خپریدو په اړه خبر ورکړ. دغه راز یې په مدینه کې د ټولنې د حالت په اړه او دا چې څرنګه خلک په مدينه کې د الله د رسول په اړه خبرې کوي او څرنګه اسلام هلته مرکزي ځای نيولی دی، په اړه هم څرګندونې وکړې. مصعب رضي الله عنه د مسلمانانو د پياوړتيا او د دوی د ستر ځواک په اړه چې پر مټ يې اسلام په مدينه کې حاکمېدلی شي، خبرې اترې وکړې. ده همدا رنګه رسول الله صلی الله عليه وسلم ته د هغو مسلمانانو په اړه چې عقيده يې پياوړې شوې وه او د دعوت رسولو په موخه یې ټینګ هوډ درلود او د الله له دين څخه د دفاع لپاره تر پخوا ډېر ژمن و او په دې اړه چې په همدې روان کال کې به دوی مکې ته راشي، خبر ورکړ.
رسول الله صلی الله علیه وسلم د يادو خبرونو په اورېدو ډېر خوښ شو او پر دغو خبرو يې اوږد او جدي فکر وکړ او د مکې ټولنه يې له مدينې سره پرتله کړه. ده صلی الله عليه وسلم په مکه کې د دین د دعوت په موخه پرله پسې ۱۲ کاله تېر کړل، له خپلو ټولو هڅو يې کار واخيست، په دې لاره کې یې خپل ټول وخت قرباني کړ، هيڅ موکه يې له لاسه ور نه کړه، بېلا بېلې سختۍ، کړاوونه او ظلمونه يې وګالل. پر دې ټولو سربېره د مکې ټولنه هم هغسې سرټمبه پاتې وه او دعوت پکې هيڅ کار ور نه کړ. خو په مدينه کې حالاتو توپير درلود، د يوه کال په تېرېدو سره د خزرج يوې ډلې اسلام قبول کړ، چې په ترڅ کې یې د عقبې لومړی تړون رامنځته شو. تر دې کال وروسته د مصعب ابن عمیر رضي الله عنه هڅو په مدينه کې اسلامي فضا رامنځته کړه او د خلکو لپاره يې لاره هواره کړه، ترڅو په بې سارې توګه اسلام ته دننه شي».
۴- لکه څرنګه چې وينو، له رسول الله صلی الله عليه وسلم سره د ځواک او دفاع څښتنانو له ليدو کتو څخه وړاندې، مصعب رضي الله عنه مکې ته ولاړ، رسول الله صلی الله عليه وسلم ته يې په مدينه کې د اسلام د خپرېدو په تړاو خبر ورکړ او د الله رسول ته يې وويل، چې په يادو خلکو کې د ځواک او دفاع څښتنان غواړي په راتلونکي کال کې له تا سره وويني، ترڅو دوی ته خپل شرطونه وړاندې کړې. پېغمبر صلی الله علیه وسلم په هغه څه چې مصعب وويل خوښ شو او ده صلی الله عليه وسلم ومنله چې راتلونکی کال به له دوی سره ليده کاته کوي. دا هغه څه دي چې پېښ شول او راتلونکی کال دوی راغلل. د بعثت ۱۲ کال و او په ترڅ کې یې د عقبې دویم تړون رامنځته شو.
۵- اوس موږ د اسلامي نظام له کتاب څخه لاندې متن را اخلو: «ځکه د الله رسول د حاجيانو راتګ ته په تمه و. دا د دعوت ۱۲ کال و، چې له ۶۲۲ ميلادي کال سره يې سمون درلود. حاجيان ډېر وو چې له دوی څخه ۷۵ مسلمانان (۷۳ نارينه او ۲ ښځې) وې. له ښځو څخه یوه نوصيبه بنت کعب اماره له بنو مازين ابن النجار او بله اسما بنت عمرو ابن عدی له بنو سلمه وه او په ام ماني سره هم مشهوره وه چې په یاده ډله کې یې ګډون درلود... د الله رسول له دوی سره په پټه وکتل... او دوی په دې ناسته کې ژمنه وکړه، چې له ده صلی الله عليه وسلم سره به په عقبه کې د تشريق د ورځو په ترڅ کې ناسته کوي. ده صلی الله عليه وسلم دوی ته وويل: «هيڅوک مه خبروئ او مه هغه چاته په تمه کېږئ چې حاضر نه وي». کله چې د شپې دريمه برخه تېره شوه، دوی د دوو ښځو په ګډون د الله له رسول صلی الله عليه وسلم سره د ليدو لپاره په پټه عقبې ته ولاړل... دوی د الله رسول ته په تمه و، تر هغې چې هغه صلی الله عليه وسلم راغی، دوی وويل، ته اوس موږ ته خپله وينا وکړه، اې د الله رسوله! د ځان او د خپل رب لپاره هغه څه غوره کړه چې ته يې غواړې». رسول الله صلی الله عليه وسلم د قران کريم تر تلاوت او اسلام تر ستايلو وروسته خبرې وکړې او ويې ويل:
«أبايعكم على أن تمنعوني مما تمنعون منه نساءكم وأبناءكم»
«زه تاسو داسې بیعت ته رابولم چې زما ساتنه به داسې کوی، لکه څرنګه چې يې د خپلو مېرمنو او ماشومانو کوی».
البرا خپل لاس د بېعت لپاره پورته کړ او ويې ويل: « اې د الله رسوله، موږ له تا سره بېعت کوو، په الله قسم موږ جنګيالي يو او وسلې لرو چې له خپلو پلرونو څخه را پاتې دي...». دوی وويل، چې موږ د الله د رسول صلی الله عليه وسلم له لوري دغو شرطونو ته غاړه ږدو او وروسته يې وپوښتل: « اې د الله رسوله، زموږ د وفادارۍ په بدله کې څه شته؟» د الله رسول صلی الله عليه وسلم په ډاډ سره ورته وويل، (جنت) دی».
له پورته بيان څخه لاندې موضوعات په ډاګه شول:
رسول الله صلی الله عليه وسلم د بعثت په لسم کال د عقبې له لومړي تړون څخه وروسته مصعب رضي الله عنه له ۱۲ تنو سره مدينې ته ولېږه. ده رضی الله عنه په مدينه کې خلک، د ځواک او دفاع د څښتنانو په ګډون اسلام ته را وبلل، د ځواک او دفاع له څښتنانو څخه يې د الله سبحانه و تعالی د دين لپاره د طلب النصرې غوښتنه وکړه. مصعب د بعثت په يوولسم کال مکې ته ولاړ او پېغمبر صلی الله عليه وسلم يې د مدينې له حالت څخه خبر کړ. ده همدا رنګه د اسلام خپرېدنه، د ځواک او دفاع څښتنانو حالت او د دوی چمتووالی، چې له پېغمبر صلی الله عليه وسلم سره به د بعثت په دولسم کال کې ناسته کوي، ترڅو پیغمبر صلی الله عليه وسلم د دين د بري لپاره خپل شرطونه ورته وړاندې کړي.
پیغمبر صلی الله عليه وسلم په مدینه کې د مصعب له کار څخه راضي شو، د ده چارې ورته د منلو وړ وې او دی صلی الله عليه وسلم په هغو پایلو چې د الله سبحانه و تعالی په اراده لاس ته راغلې وې، ډېر خوښ شو. نو پر همدې اساس د بعثت په دولسم کال د ۷۳ نارينه و او د ۲ ښځو په ګډون د عقبې دویم تړون رامنځ ته شو، ورپسې هجرت او بیا د دولت تاسيس پيل شو.
پر همدې بنسټ په مدينه کې د طلب النصرې په لاره کې د مصعب رضي الله عنه چارې یو بنسټیز ستون جوړوي. الله سبحانه و تعالی د ځواک او دفاع څښتنانو پر مټ د خپل دين د ملاتړ لپاره بری رامنځته کړ. زه یو ځلې بیا هغه څه تکراروم چې مصعب رضي الله عنه پیغمبر صلی الله عليه وسلم ته وويل: «مصعب د مسلمانانو د پياوړتيا او د دوی د ستر ځواک په اړه، چې پر مټ يې اسلام په مدينه کې حاکم کېدلی شي، رسول الله صلی الله علیه وسلم خبر کړ. ده همدا رنګه د مسلمانانو په اړه چې عقيده يې پياوړې شوې وه، د دعوت د رسولو په موخه د دوی له ټينګ هوډ څخه او تر پخوا د الله له دين څخه د دفاع په اړه، رسول الله صلی الله عليه وسلم ته خبر ورکړ».
الله سبحانه و تعالی پر مصعب رضي الله عنه ولورېد او ور څخه راضي شو، ده ته یې لویه بریا ورپه برخه کړه او دغه بریا د رسول الله صلی الله علیه وسلم لپاره د عقبې د دویم تړون د رامنځته کېدو، د هجرت د پیل او دولت د تاسیس لامل شوه. ټوله ستاينه هغه الله لره ده، چې د نړۍ پالوونکی دی.
انشاء الله همدومره به بس وي
ستاسې ورور عطا بن خليل ابو الرشته
پوښتونکي: جهاد جهاد او عطیه الجبرین
ژباړن: صديق احمدزی
په الاقصی مبارک مسجد کې د سیاسي مفکر احمد الخطواني (ابو حمزه) اونیز سیاسي تحلیل
۱۴۳۹ه.ق، د محرم الحرام ۱۶مه، چهارشنبه/ ۲۰۱۸م، د سپټمبر ۲۶مه
د حزب التحریر د مرکزي مطبوعاتي دفتر د رییس دکتور عثمان بخاش (ابو عبیده) اونیز سیاسي تحلیل
۱۴۳۹ه.ق، د محرم الحرام ۱۷مه، پنجشنبه/ ۲۰۱۸م، د سپټمبر ۲۷مه
