یکشنبه, ۲۹ صَفر ۱۴۴۴هـ| ۲۰۲۲/۰۹/۲۵م
ساعت: مدینه منوره
Menu
القائمة الرئيسية
القائمة الرئيسية

د حزب التحریر د شبابو پر وړاندې له بې عدالتۍ ډکې سزاګانې ترهګري او ظلم دی Featured

  • خپور شوی په اردن

د تجدید نظر محکمې د دولتي امنیتي محکمې هغه پرېکړه تایید کړه چې د حزب التحریر دوه کسان یې په نوموړي حزب کې د غړیتوب او د رژیم پر وړاندې د تحریک په تور هر یو په څلور کاله زندان محکوم کړی وو، د دوی په کورونو کې یې د حزب نشراتي پاڼې او کتابونو ترلاسه کړي وو. غواړو په دې اړه وضاحت ورکړو:
د یو سیاسي حزب په توګه د حزب التحریر تاسیس د اسلامي ژوند د بیا احیاء لپاره یو شرعي مکلفیت دی چې الله تعالی پرې امر کړی دی. د اردن د نظام او محکمو په قوانینو کې هېڅ داسې ټکی نشته، ځکه چې اساساً د باطل پر بنسټ ولاړ دي. سربېره پر دې، حزب التحریر د سیاسي او فکري مبارزې لپاره دعوت کوي او هېڅ ډول مادي کړنو لکه وسلوالو فعالیتونو کې یې ګډون نه دی کړی. د خلافت دولت یوازې په اردن پورې نه، بلکې ټولو اسلامي خاورو پورې اړه لري. اردن خپله ادعا کوي چې د حزب التحریر دعوت د دوی حاکم نظام کمزوری کوي، په داسې حال کې چې حزب په ښکاره توګه په ډېری اسلامي خاورو کې سیاسي فعالیت کوي او هغه رژيمونه یې د خپلې واکمنۍ د کمزوري کولو پروړاندې خنډ نه ګڼي؟!
د حزب التحریر پر شبابو د زندان دغه ظالمانه سزا، یوازې په دې دلیل چې په یو سیاسي حزب پورې تړاو لري او د اسلام پر اساس د ژوند د بیا احیاء غوښتنه کوي، د دولت د امنیتي محکمې له لوري یو ترهګریز عمل دی او د هغو کسانو ځپل دي چې د امت د ژغورلو لپاره سیاسي مبارزه کوي، تر څو د ښکېلاکګرو له سیاسي او اقتصادي واکمنۍ څخه ځان خلاص کړي. همدا رژیم د عصري کولو او سیاسي تعدیلاتو ادعا کوي چې غواړي سیاسي احزاب رامنځ ته کړي، خو په عمل کې دروغ وايي. لکه څنګه چې موږ په تېرو ویناوو کې وویل، هغه احزاب چې رژيم یې غواړي باید د دوی له سیاسي پرېکړو سره موافق وي، ترڅو خپل هېواد او خلک ذلیل کړي او هېواد یې د ښکېلاکګرو په واک کې ورکړي. خپل هېواد یې ښکېلاکګرو کفارو ته د پوځي اډې په وړاندیز سره خلاص کړ او اردو یې د دوی په چوپړ کې ورکړه.
اې مسلمانانو:
د اسلامي ژوند د بیا احیاء او د خلافت دولت د بیا تاسیس لپاره کار نه یوازې پر حزب التحریر، بلکې پر تاسو ټولو کفايي فرض دی. دا کار د خلافت تر تاسيس پورې ستاسو پر غاړه فرض پاتې دی او د حزب التحرير د شبابو پر وړاندې دغه ناحقه او تبعيضي احکام د اسلام لپاره د مبارزې د بندولو يوه برخه ده، چې هڅه کوي ستاسو په زړونو کې وېره واچوي او پر دې لویه لاره ستاسو د تګ پر وړاندې خنډونه جوړ کړي، چې د الله سبحانه وتعالی له لوري پر موږ وضع شوې ده.
حزب التحریر له ۱۹۵۳م کال راهیسي د اسلامي ژوند د بیا احیاء لپاره کار کوي او پر امت غږ کوي چې خلافت بیا تاسیس کړي. حزب التحرير یو سیاسي حزب دی چې اصل یې اسلام دی او کړنې یې ټولو ته ښکاره دي، چې په څلوېښتو هېوادونو کې حضور لري او د هغو قاضیانو له نیولو، ظلم او غیر عادلانه حکمونو څخه وېره نه لري، چې خپل اخروي ژوند یې پلورلی دی. د دوی د واکمنانو نړۍ کمزوري او لړزانده رژيمونه لري چې د الله سبحانه و تعالی له بلنې او د احکامو له پلي کولو یې زړونه لړزېږي.


[...وَاللَّهُ غَالِبٌ عَلَى أَمْرِهِ وَلَكِنَّ أَكْثَرَ النَّاسِ لَا يَعْلَمُونَ]
ژباړه: «...الله تعالی په خپله چاره کې غالب او برلاسی دی، خو ډېری خلک نه پوهېږي» [یوسف: ۲۱]
د حزب التحریرـ ولایه اردن مطبوعاتي دفتر

د مطلب ادامه...

جهاد او صدقات

عن أبي موسى الأشعري رضي الله عنه أن النبي صلى الله عليه وسلم قال‏:‏ ‏"‏ليأتين على الناس زمان يطوف الرجل فيه بالصدقة من الذهب، فلا يجد أحداً يأخذها منه، ويرى الرجل الواحد يتبعه أربعون امرأة يلذن به من قلة الرجال وكثرة النساء‏"‏ ‏‏رواه مسلم‏.‏‏

ژباړه: له ابوموسی اشعري رضي الله عنه څخه روايت دی چې رسول الله صلی الله عليه وسلم فرمايلي دي: «پر خلکو به خامخا داسې وخت راشي چې يو سړی به د سرو زرو له زکات سره ګرځي راګرځي، خو داسې څوک به نه شي موندلی چې له ده څخه زکات واخلي او په دغه وخت کې به د سړيو د کمښت او ښځو د ډېروالي له امله څلوېښت ښځې په يوه سړي پسې وي او پر هغه به يې تکيه کړې وي.»

دا حديث موږ ته د داسې څه په اړه معلومات راکوي چې تر اوسه نه دې پېښ شوي او زموږ په وخت کې نه دي راغلي. دا پر دې د لالت کوي چې وختونه بدلېږي او تغير پکې راځي. پر موږ او بشريت به داسې وخت راشي چې خلک به پکې ډېر شتمن وي او زکاتونه به دومره ډېر وي چې داسې څوک به نه پيدا کېږي چې وړ يې وي او وايې خلي. پر دې سربېره دا حديث پر دې هم دلالت کوي چې د دغه امت شتمني چې کفارو او د هغوی ملاتړو او مزدورانو ترې اخيستې، بېرته به امت ته راوګرځي، تر دې چې د شتمنۍ له امله او د اسلام تر حاکميت لاندې د عزتمن ژوند له امله به داسې څوک نه پیدا کېږي چې کوم څه ته اړ وي، ان داسې حالت به راشي چې اواز کوونکی به اواز کوي چې ايا څوک شته چې زکات غواړي؟ نو هېڅوک به ځواب نه ورکوي، ځکه هېڅوک به ورته اړ نه وي.
يو بل شی چې د دې زېری ورکوي چې اسلام به حاکميت تر لاسه کړي، هغه د سرو زرو يادونه ده، ځکه د اسلام مالي نظام يوازينی نظام دی چې په راکړه ورکړه کې پر سرو او سپينو زرو ولاړ دی او له څه وخته چې پر سرو او سپينو زرو تکيه پرېښودل شوې، اقتصاد فاسد شوی دی.
دغه راز په حديث کې بله نکته دا ده چې موږ ته د الله تعالی په لار کې د جهاد او قتال او فتوحاتو زېری راکوي؛ هغه څه چې نږدې يوه پېړۍ ترې بې برخې يو. دا نکته د حديث په دې توصيف کې ده چې ښځې به سړي نه شي موندلی. دا له دې امله چې سړي به ډېر وژل کېږي، نه دا چې ګوندې ښځې به زياتې وي، ځکه دلته د سړيو کمښت د جهاد او قتال په سبب رامنځته کېږي چې په دغه وخت کې به ډېر زور واخلي.
دا پېښې تر اوسه نه دي رامنځته شوې، خو ان‌شاء الله په نږدې راتلونکې کې پېښېدونکې دي او موږ هيله لرو چې موږ به هم په دغه زمانه کې يو. ګڼ شمېر شواهد شته چې د دغه وخت پر نږدېوالي دلالت کوي چې د اسلام اقتصادي نظام به پکې راوګرځي او د اسلام د نشر لپاره به ځوانان د جهاد لپاره بيړه کوي.
پر دغه اساس د شک کوونکو او هغو کسانو لپاره چې په زړونو کې يې کمزوري ده، هېڅ مجال نه شته چې له دغو حتمي پېښېدونکو حقايقو څخه انکار وکړي. کله چې رسول الله صلی الله عليه وسلم د يوې معينې پېښې او وخت صفت بيانوي، دا په دې معنا ده چې دغه حالت به ژر راڅرګند شي.
څرنګه چې الله سبحانه و تعالی رسول الله صلی الله عليه وسلم ته په دې توګه صبر ورکاوه چې هغه او امت به يې لوړ مقام، عزت او لوړوالي ته ورسېږي، دلته رسول الله صلی الله عليه وسلم موږ ته د عزت او لوړ مقام زېری راکوي. نو کوم څه پر موږ لازم دي، دا دي چې د رسول الله د لارې پيروي وکړو، تر څو امن او سلامتۍ ته ورسېږو او له ګناهونو خلاصون ومومو.
اې الله! له تا څخه غواړو چې موږ دغې زمانې ته ورسوه چې زړونه به پکې يخ شي، چارې به خپل اصلي حالت ته راوګرځي او ټولې ځمکې او بنده ګانو ته به خير ورسېږي. اللهم آمين.

د مطلب ادامه...

د لوڼو ساتنه او پالنه

  • خپور شوی په مقالې

عن عائشة رضي الله عنها، قالت: "دخلتْ امرأةٌ معها ابنتانِ لها تسأَل، فلم تجدْ عندي شيئًا غيرَ تمرةٍ، فأَعطيتُهَا إيَّاها، فَقَسَمَتْهَا بينَ ابنتيْها ولم تأكُلْ منها، ثم قامتْ فخرجتْ، فدخلَ النبيُّ، صلى الله عليه وسلم، علينا فأخبرته، فقال: "من ابْتُلِي من هذهِ البناتِ بشيٍء كُنَّ لهُ سِترًا من النار" رواه البخاري.

ژباړه: له عائشې رضي الله عنها څخه روایت دی، هغه وايي: «يوه ښځه چې دوې لوڼې يې ورسره وې او سوال يې کاوه (زما کور ته) راغله. له ما سره له يوې خرما پرته بل څه نه وو، نو هغه مې ورکړه، هغه يې پر دواړو لوڼو ووېشله او خپله يې څه ترې ونه خوړل، بيا پاڅېده او لاړه. کله چې رسول الله صلی الله عليه وسلم راغی، له دې پېښې مې خبر کړ، نو ويې فرمايل: «څوک چې په لوڼو ابتلاء شي (او له هغوی سره ښه وکړي) نو لوڼې به يې د ده لپاره اور ته د تګ څخه مانع وي.»
 
 په پورته حديث کې د «من ابْتُلِي من هذهِ البناتِ بشيٍء» په مفهوم کې اختلاف دی، چې ايا پخپله د لوڼو شتون د ابتلاء لامل دی او که هغه کارونه چې له لوڼو څخه کېږي او والدين پرې ابتلاء کېږي.
کېدای شي په دغه ځای کې د ابتلاء موخه ازمايښت وي، يعنې که څوک پر لوڼو باندې و ازمويل شي، نو کتل کېږي چې څه ورسره کوي، ښه که بد.  
نووي رحمه الله وايي: دلته د لوڼو لپاره ځکه د ابتلاء لفظ کارول شوی، چې خلک لوڼې نه خوښوي، نو شريعت د خلکو دا کار ناوړه ګڼي، د لوڼو پايښت او د هغوی د وژلو ترک ته يې هڅوي او څوک چې له لوڼو سره نېکي کوي او صبر ورباندې کوي، د هغوی لپاره يې ثواب او غوره بدل ذکر کړی دی.
  
په دې حديث کې د لوڼو د حق پر رعايت او د هغوی پر پالنه او ساتنه ټینګار شوی، ځکه دوی کمزورې دي او د کمزورۍ له امله نه شي کولی چې پخپله د خپلو مصالحو لپاره ګام پورته کړي. د نارينه‌وو برعکس، ځکه هغوی په بدني لحاظ پياوړي دي او په ډېری حالاتو کې د دې وړتيا لري چې خپلې چارې پخپله سمبال کړي.
 
اسلام راغلی، ترڅو د ښځې ساتنه وکړي او د ژوند په هره مرحله کې يې رعايت وکړي، نو اسلام امر کوي چې د هغې رعايت او ساتنه وشي، نفقه ورکړل شي، د خپلوۍ اړېکه ورسره وپالل شي او نېکي ورسره وشي. ښځه لور ده، خور ده، مور ده، ترور ده، انا ده...
نو د الله تعالی د دغه لوی فضل شکر اداء کوو او د هغه حمد وايو.

د مطلب ادامه...

اې اردوغانه! ايا له قران او سنتو پرته اسلام شته؟

خبر
ولسمشر رجب طیب اردوغان د عدالت او پراختیا ګوند په غوڼده کې وویل: «له الله، محمد او علي پرته علوېزم نشته» (علویان یوه مذهبي ډله ده چې په ترکیه او سوریه کې پلویان لري). او هغه ډلې چې د ګمراه کوونکو تبلغاتو پر اساس رامنځته شوې وي، د انسانیت تمه نه ترې کیږي» (یني شفق ورځپاڼه، ۲۰۲۲م کال، د سپټمبر ۳مه)
تبصره
اردوغان چې په ۲۰۰۲ کال کې واک ته رسېدلی؛ تر اوسه یې د قران او سنتو پراساس حکومت نه دی کړی او له اسلام او مسلمانۍ څخه یو صوفیانه او عرفاني درک لري. نوموړی د اقتصاد، ادارې، ښوونې، روزنې او د ټولنیز ژوند په نورو برخو کې د ترکیې پر خلکو د پانګوالۍ ایډیولوژۍ پر بنسټ حکومت کوي او اسلام او مسلماني یې یوازې تر عبادت او اخلاقو پورې محدوده کړې ده. په بل عبارت؛ د اردوغان په اند، اسلام یو عرفاني او تصوفي دین دی چې د خالق او بنده ترمنځ اړیکه تنظیموي او د انسانانو تر منځ پر اړیکو هېڅ نفوذ نه لري. دی که څه هم دا خبرې په خوله نه کوي، خو کړنې یې همدا ثابتوي.
موږ پوښتو چې: «که له الله، محمد او علي پرته علوېزم نه وي» نو ایا له قران او سنتو پرته اسلام شته؟ ایا اسلام دا دی چې اقتصاد، اداره، سیاست، بهرنی سیاست، قوانین او نظامونه له لوېدیځ څخه راغلې پانګوالۍ ايډیولوژۍ څخه واخلې او عبادت له قران او سنتو څخه؟ ایا اسلام دې ته وايي چې پانګوال سیکولر افکار ومنئ، ویې لېږدوئ، پلي يې کړئ او په څنګ کې ورسره یو څه اسلامي احساسات ولرئ؟
اسلام د یهودیت او مسیحیت په څېر نه دی، ځکه چې دا دواړه دینونه د ژوند د ټولو چارو د تنظیم لپاره قانون او مقررات نه لري؛ یوازې تر معنويت پورې محدود دی. اسلام داسې دین نه دی. اسلام د پانګوالۍ او کمونیزم په څېر یوه ايډیولوژي ده او له عبادت څخه نیولې تر اقتصاد، ادارې، زدکړې او بهرني سیاست پورې د ژوند د ټولو چارو لپاره مقررات لري. لنډه دا چې اسلام یو سیاسي دین دی. که چېرته موږ هم د عیسویت په څېر اسلام يوازې تر معنوي اړخ پورې محدود کړو او سیاسي برخه ترې لرې کړو؛ نو دا په دې معنی ده چې موږ د کفارو ګټې خوندي کوو، د دوی غلامي کوو او غلام يې پاتې کېږو. اسلام خالص عرفاني او تصوفي فکر نه دی، بلکې تر دې ډېر لوړ دی. له اسلام څخه دا ډول درک استعمارګر کافر غرب د مسلمانانو په مغزو کې پیچکاري کړی او د دې لپاره چې خپله سلطه او واکمني وساتي، پر مسلمانانو یې خپل ګوډاګیان حاکم کړي. الله سبحانه وتعالې د دغه ډول خلکو په اړه فرمایي.

(اَفَتُؤْمِنُونَ بِبَعْضِ الْكِتَابِ وَتَكْفُرُونَ بِبَعْضٍۚ)
ژباړه: «ایا تاسو د دغه كتاب پر ځينو برخو (حكمونو) ايمان راوړئ او پر ځينو يې كافر كېږئ؟» [بقره: ۸۵]

د دې ایت مطابق؛ ایا د اسلامي نړۍ اوسني سیاستوال چې د عبادت په برخه کې د قران او سنتو مطابق عمل کوي، خو د اقتصاد، ادارې او جزایي نظام په برخو کې د قرآن پرځای د پانګوالې ايډیولوژۍ پیروي کوي او غرب یې د قبلې په توګه منلی؛ د الله سبحانه وتعالې له ځینو آیتونو څخه انکار نه کوي؟ که څه هم دوی د مسلمانانو د عامه فکر له وېرې له دغو ایتونو په ژبه انکار نه کوي، خو عملونه او کړنې یې هر څه ښيي.
په قرآن او سنتو کې د پېرلو، سوداګرۍ، بهرني سیاست، عقوباتو، ټولنیز نظام او همدارنګه د عبادت په اړه احکام راغلي. په داسې حال کې چې په ترکیه کې په پراخه کچه سودي معاملې کېږي؛ په اسلام کې سود په صریح نص سره حرام شوی. اردوغان وایي چې پر الله باور او توکل لري، خو پر هغه څه حکم نه کوي چې الله سبحانه وتعالې نازل کړي. مذهبي ځوانانو ته وایي چې شراب حرام دي، خو تر واکمنۍ لاندې یې د شرابو فابریکو ته اجازه ورکوي او د تولید مخنیوی یې نه کوي. په حقیقت کې دا ټول تبلیغات یوازې د عامه افکارو د غولولو لپاره کوي. له دغه ډول شعارونو څخه د سیاسي ګټې او استثمار لپاره کار اخلي او د پانګوالۍ ایډیولوژۍ او غرب غلامي کوي.
د مسلمان خبره او عمل یو شی وي. خو که موږ په خپلو هیوادونو کې د غرب او پانګوالۍ د غلامو حکامو خبرو او عملونو ته وګورو، ډېر توپیر پکې وینو. د دې غوره بېلګې لکه پورته چې یادې شوې؛ سود، شراب او ... دي. پیغمبر صلی الله علیه وسلام د دغو کسانو په اړه فرمایي:


«يقرأون القرآن لا يجاوز حناجرهم»
ژباړه: «دوی قران لولي؛ خو له مرۍ نه یې نه ښکته کېږي.» (ترمذي)

د حزب التحریر مرکزي‌ مطبوعاتي دفتر ته
اېرجان تېکینباش
ژباړه: محمد هارون رؤفي

د مطلب ادامه...

د هند هندوتوا رژیم د مسلمانانو قاتلان او پر هغوی جنسي تیری کوونکي وبښل Featured

 

د هند حکومت د اګسټ په ۱۵مه، په ګوجرات ایالت کې ۱۱ تنه هغه هندوان ازاد کړل چې په ۲۰۰۲م کال کې  د دولت له لوري د مسلمانانو نسل وژنې په ترڅ کې پر یوې مسلمانې ښځې، بلقیس بانو د ډله ییز جنسي تېري او د هغې د درې کلنې لور په ګډون د هغې د کورنۍ د څو غړو د وژلو په جرم په عمري بند محکوم شوي وو. بلقیس د پنځو میاشتو امېندواره وه چې دغو کسانو برید پرې وکړ؛ لور یې د دې په مخ کې پر سر په ډبره وویشته او ځای پرځای یې ووژله. دا تېری کوونکي له ازادېدو وروسته د بلقیس د اوسني استوګنځي نیږدې کلیو ته راغلل او د ازادۍ په خوښۍ کې یې خواږه ووېشل؛ د بلقیس بانو د ژوند او د هغې د کورنۍ د خوندیتوب وېره پر ځای پاتې شوه.  

د ګوجرات حکومت چې د لومړي وزیر نریندرا مودي هندو ملتپاله او مسلمان ضد (BJP) ګوند له لوري رهبري کېږي، دا کسان یې د هند د خپلواکۍ د ۷۵مې کلیزې په مناسبت ازاد کړل؛ دا په داسې حال کې ده چې مودي د همدې خپلواکۍ لمانځلو په غونډه کې له هندیانو وغوښتل چې د ښځو کرامت ته درناوی وکړي. په دې ورځ د هندو جنسي تېری کوونکو ازادول ښیي چې د هند دولت له لوري مسلمانې ښځې له خوندیتوب څخه مستثنی دي او د همدې حکومت تر چتر لاندې د مسلمانانو د قاتلانو او پر دوی د تېري کوونکو بښل د هند د مسلمانانو راتلونکی دی. په حقیقت کې، د هندوانو بېلابېلو مذهبي مشرانو او د هندوتوا مشرانو په عامه توګه د مسلمانانو پر وړاندې د نسل وژنې غږ پورته کړی دی. د روان کال په اپرېل کې، په اتراپردېش ایالت د خیراباد سیمې د یوه جومات په مخ کې د خبرو پر مهال د هندوانو یوه مشر پر مسلمانو ښځو د جنسي تېري او د هغوی د اختطاف ګواښ وکړ.

دا د هندوتوا انصاف دی، چې د مسلمانانو قاتلانو او پر هغوی جنسي تېری کوونکو ته ازادي ډالۍ کوي او هغو کسانو ته په ښکاره د تفرقې او تاوتریخوالي زیاتولو اجازه ورکوي چې د اسلام او مسلمانانو پر وړاندې کرکه خپروي. نن ورځ، په هند کې مسلمانې ښځې او نجونې د دوی پر ځان او عزت د برید په وېره کې ژوند کوي، ځکه دوی پوهېږي چې د دې جرمونو ترسره کوونکو ته د اتلانو په سترګه کتل کېږي؛ هېڅ داسې اداره نشته چې له دوی څخه دفاع وکړي او د اسلام دښمنان د هغوی د وحشتناکو جنایتونو له امله د عدالت مېز ته راکش کړي. سربېره پر دې، غربي دولتونه چې په ډېره چالاکۍ په اسلامي احکامو او شریعت پورې درواغ تړي، اسلام پر ښځو په ظلم او د هغوی د حقونو په تر پښو لاندې کولو تورنوي؛ د مالي ګټو لپاره په ښکاره د مودي او د هغه رژيم ته غېږه پرانېزي او د بلقيس په څېر ښځو پر وړاندې د عدالت پلي کولو په اړه چوپه خوله دي. له دې څخه ښکاري چې د مسلمانو ښځو د هوساینې په اړه دوی هېڅ اندیښنه نه لري او د ښځو د حقونو ټولې خبرې یوازې یوه وسیله ده چې د مسلمانو ټولنو په منځ کې د دوی د سیکولار، اسلام ضد اجنډا د دود کولو لپاره کار ترې اخیستل کېږي.

اسلام ته د مسلمانې ښځې د عزت ارزښت، بې مثاله دی. د دې ارزښت لپاره زموږ ګران رسول صلی الله علیه وسلم یوه یهودي قبیله- بنو قینقاع چې په مدینه کې یې د یوې مسلمانې سپکاوی کړی و- له مدینې څخه وشړله. د دې ارزښت لپاره د خلافت تر چتر لاندې مسلمانو مشرانو جګړې کولې او د دغه ارزښت د ساتنې او دفاع لپار یې هېوادونه فتح کول؛ په ۸مه پېړۍ کې خلیفه ولید بن عبدالملک د مسلمان جنرال، محمد بن قاسم په مشرۍ یو لوی لښکر جوړ کړ چې د هند د ظالم هندو پاچا، راجا دایر له لوري زنداني شوې ښځې وژغوري. په نهمه پېړۍ کې خلیفه معتصم باالله د ترکیې عموریې ښار ته یو لوی لښکر واستاوه، چې د رومیانو لخوا د یوې نیول شوې او ځورول شوې مسلمانې ښځې غچ واخلي. په حقيقت کې د دې امت د ميندو او لوڼو لپاره عدالت، خوندیتوب او پالنه د نبوت پر منهج د راشده خلافت دولت له راګرځېدو پرته هېڅکله نه رامنځته کېږي. خلافت په ریښتيني ډول د دوی د ګټو او دين دفاع کوي، هوساینې ته یې پام کوي او عدالت ورته ټينګوي. رسول الله صلی الله علیه وسلم فرمايي:

«الإِمَامُ رَاعٍ وَمَسْؤُولٌ عَنْ رَعِيَّتِهِ»

ژباړه: «امام (خلیفه) ساتونکی دی او د خپل رعیت مسؤلیت لري»

ډاکټر نسرین نواز

د حزب التحریرـ ښځو برخې د مطبوعاتي دفتر مشره

 

 

د مطلب ادامه...

که موږ کفري دولتونه حق ته را دعوت نه کړو؛ دوی مو باطل ته ور دعوتوي! Featured

د امریکا د بهرنیو چارو وزارت ویاند، نډ پرايس د پنجشنبې په ورځ په مطبوعاتي کنفرانس کې وویل: «موږ په ډاګه ویلي چې د طالبانو د رسمیت پېژندلو په لټه کې نه یو. موږ په دې لټه کې يو چې یوازې په عملي ګامونو سره په ځينو برخو کې له طالبانو سره عملي تعامل ولرو او په دې هیله یو چې دا ګامونو به طالبان سمې لارې ته برابر کړي او په دې توګه به له دوی سره تعامل ته دوام ورکړو».

د حزب التحریر-ولایه افغانستان مطبوعاتي دفتر په دې اړه څو ټکو ته اشاره کوي:

۱. امریکا د «سمې لارې» خبره کوي؛ ځکه هر دولت او نظام داسې فکر کوي چې دوی پر سمه او مستقیمه لار روان دي. د امریکا دولت هم د سیکولر عقیدې او خپلو ګټو پر بنسټ خپله لاره سمه او د نورو ناسمې بولي. کله چې امریکا وايي چې اسلامي امارت به «سمې لارې» ته برابر کړو، په حقیقت کې غواړي چې اسلامي امارت باطلې لارې؛ یعنې د سیکولرېزم، سیکولر نړیوال نظم او لیبرال ارزښتونو لارې ته سم کړي او له بلې خوا یې په سیمه کې له خپلو ګټو سره همغږی کړي.

۲. د امریکا د بهرنیو چارو وزارت ویاند دغه راز ویلي چې امریکا له اسلامي امارت سره د تعامل او «سمې  لارې» ته د دوی د سمولو لپاره د دې په لټه کې ده چې «عملي ګامونه» پورته کړي. له عملي ګامونو یې موخه همغه ستراتیژۍ او پالیسۍ دي چې له لسیزو راهیسې غربي قدرتونو او په ځانګړي ډول امریکا د اسلامي امت پر وړاندې عملي کړې دي. د دغو عملي ګامونو يوه برخه د ګواښلو او تطمیع سیاست دی چې امریکا غواړي له دې لارې اسلامي امارت د غربي ارزښتونو او خپلو استعماري ګټو لارې ته برابر کړي. نغدي مرستې او سیاسي تعامل د تطمیع په توګه او سیاسي فشارونه، اقتصادي بندیزونه، د پیسو کنګل کول، ډرون بریدونه او استخباراتي چاودنې د ګواښونو په توګه یادولی شو. همداراز د ټول‌شموله حکومت غوښتنه، بشري حقونه، د ښځو حقونه، له «ترهګرۍ» سره مبارزه، د ترهګرو لپاره په خوندي ځای د افغانستان نه بدلېدل او نور هغه موارد دي چې امریکا غواړي د دغو مواردو په واسطه اسلامي امارت هغې لارې ته برابر کړي چې دوی یې «سمه» بولي.

۳. هر مبدائي او ایډیولوژيک دولت خپله عقیده لري چې د هغو پر بنسټ ځان ته ښه او بد تعریفوي او خپلې ګټې او زیانونه سنجوي. امریکا چې د لیبرال نړیوال نظم د رهبرۍ داعیه لري، له یوې خوا فکر کوي چې نړۍ سمې لارې ته برابره شوې او سیکولرېزم هماغه صراط المستقیم دی. له بلې خوا، کله چې په خپل بهرني سیاست کې د سمې لارې خبره کوي؛ په حقیقت کې یې موخه خپلې استعماري ګټې دي او نور خلک د هغو تابع ګرځوي. په داسې حال کې چې یوازنۍ سمه لار هغه لار ده چې الله متعال د خپل وروستي پيغمبر په رسالت سره مشخصه کړې. سمه لاره (صراط المستقیم) یوازې اسلام دی چې د اسلامي دولت له لوري په دار الاسلام کې پلی کېږي او د دعوت او جهاد له لارې دارالکفر ته رسول کېږي.

نو که موږ خپل رسالت ترسره نه کړو، د نبوت پر منهج راشده خلافت تاسیس نه کړو او د خپل دولت په بهرني سیاست سره نور جنت او سمې لارې ته دعوت نه کړو؛ هغوی به موږ د دوزخ لارې ته دعوت کړي. ځکه کله چې حق د مبارزې ډګر پرېږدي، باطل داسې فکر کوي چې حق دی او ان په ډېر جرات سره نور خپل لوري ته رابولي.

د حزب‌التحریر - ولایه افغانستان مطبوعاتي دفتر

د مطلب ادامه...

د حزب التحریر د مرکزي مطبوعاتي دفتر د ښځو څانګه: په اروپا کې پر حجاب برید!

  • خپور شوی په سیاسي

د ۲۰۲۲ م کال د اګېسټ پر ۲۵مه د ډنمارک دولت د ټاکل شوي کمېسیون لخوا په یاد هېواد کې په ښوونځیو کې د نجونو پر حجاب اغوستلو د بندیز وړاندیز شوی.

دغه بندیز به په خصوصي، وړیا او دولتي ابتدایه ښوونځیو کې پلی شي.

تر دې وړاندې په نورو اروپایي هېوادونو کې هم په ښوونیزو مرکزونو او ښوونځیو کې د حجاب پر اغوستلو بندیزونه لګول شوي دي، خو پر حجاب دغه بندیز سیاسي اړخ لري او دا څرګندوي چې څه ډول باید مسلمانان دغه بندیز ته غبرګون وښيي.

 

د مطلب ادامه...

له خلافت پرته، ان د نړۍ تر ټولو ستر پوځ لرل هم امت له زیان او کړاو څخه نه شي ژغورلی

خبر

په پاکستان کې موسمي بارانونو تر اوسه تر ۱۰۰۰ د ډېرو کسانو ژوند اخیستی چې ۱۱۹ یې یوازې په یوه ورځ وو. داسې راپورنه شته چې خلکو د ځان ژغورنې لپاره له چپرکټ او لنډمهاله نا مسلکي تجهیزاتو کار اخیسته.

په دې ډول پېښو کې د دولتونو دنده دا نه وي چې په ملیونونو وګړي له کومې مرستې پرته د خطر په خوله کې پرېږدي یا ورو او محدوده مرسته ورته ورسوي. والدینو راپور ورکړی چې ماشومان یې د پرېمانه اوبو د ناڅاپه راتګ په سبب له منځه تللي.

د کورنیو چارو وزارت یوه چارواکي، سلمان صوفي د نړیوال ملاتړ په اړه نهیلي څرګنده کړه او ویې ویل: «پاکستان له اقتصادي ستونزو سره لاس او ګریوان و، اوس چې پر دغو ستونزو د لاسبري کېدو په حال کې وو، دا موسمي طبعي پېښې وشوې».

د ډان ورځپاڼې د راپور له مخې، د پاکستان لومړي وزیر شهباز شریف د خیبر پښتونخوا ایالت لپاره، چې تر ټولو ډېر ځپل شوی، د ۱۰ ملیاردو روپیو (۴۵ میلیونو ډالرو) مرستې اعلان وکړ.

شریف وویل، هرې سېلاب ځپلې کورنۍ ته به ۲۵۰۰۰ روپۍ ( ۱۱۲ ډالر ) ورکړل شي. د دغو پيسو وېش په یوه اونۍ کې کېږي. ( بی بی سی )

تبصره

ایا یوه کورنۍ چې خپل هر څه او د عایدو سرچینه یې له لاسه ورکړې وي، په دې ۱۱۲ ډالرو خپلې اساسي اړتیاوې پوره کولی شي؟ چارواکي د دې پرځای چې د امت د ژوند او مرګ وضعت ته پام وکړي، د عامه افکارو د غولولو لپاره یوازې سرسري اقدامات کوي. د پېردولو لپاره په سیمه کې هېڅ خواړه نشته او ټول کاروبارونه له منځه تللي. د پاکستان اقتصادي ستونزې د عادل اسلامي اقتصادي نظام د پرېښودلو پایله ده.

که شرعي قانون بشپړ پلی شوی وای، پاکستان به په دومره ذلت بهرنۍ مرستې نه غوښتلې. د شتمنې اسلامي نړۍ ټولې سرچینې به د پخوا په څېر په سمه توګه سره یوځای شوې وای، بې کوره شویو مسلمانانو ته به یې د مرستې یو لوی پکېج برابر کړی وای او له دوی سره به یې مرسته کړې وای چې خپل عادي ژوند بیا پیل کړي. په داسې شرایطو کې اساسي دنده دا ده چې زیانمنو خلکو ته لومړي بشري حقونه؛ خواړه، جامې، سرپناه، روغتيايي خدمتونه او د زده‌کړې فرصتونه بابر کړي. سېلاب ځپلو ته د يو څو ډالرو ورکول د امت ستونزې هغسې نه حل کوي چې الله سبحانه وتعالې یې امر کړی.

پاکستان په نړۍ کې یو ستر او ښه سمبال پوځ لري، خو دا چې اسلامي  خلافت نشته او د کفري ځواکونو سیکولر قوانینو ته ژمن دی؛ نو یوازې یوه تت تصویر ته ورته دی چې عملي ګټه نه لري. الله سبحانه وتعالې دې دا د ذلت او کړاوونو دوره د راتلونکي د تاریخ د کتابونو له متن څخه لرې کړي او د نړۍ مسلمانانو ته دې د اسلام له حکم سره سم ریښتني حقونه ورکړي.

(يَا أَيُّهَا الَّذِينَ آمَنُوا اتَّقُوا اللَّهَ وَكُونُوا مَعَ الصَّادِقِينَ)

ژباړه: «اى هغو كسانو چې ایمان مو راوړى! له الله څخه ووېرېږئ او له ریښتینو کسانو سره ملګري شئ.» [توبه ۹: ۱۱۹]

د حزب التحریر مرکزي مطبوعاتي دفتر ته

عمرانه محمد

ژباړه: محمد هارون ر‌ؤفي

د مطلب ادامه...

د برېتانیې د ملکې پر مرګ د مسلمانانو د واکمنانو ماتم غربي استعمار ته د دوی ژمنتیا ښیي Featured

  • خپور شوی په پاکستان

د پاکستان لومړي وزیر شهباز شریف د ۲۰۲۲م کال، د سپټمبر په ۸مه، پر خپله رسمي ټويټر پاڼه لیکلي وو: «د ملکې الیزابت دویمې پر مړینه سخت خواشینی شوم. پاکستان له انګلستان او نورو مشترک المنافع هېوادونو سره د هغې د مړینې په غم کې ځان شریک بولي». د اسلامي نړۍ واکمنانو؛ عربو او عجمو د برېتانیې د ملکې پر مړینه داسې خواشیني وښوده، چې ته به وایې یو عادل او زړه سوانده خلیفه یې مړ وي. وړاندې له دې چې مسلمانان د داسې واکمنانو په غم کې ځان شریک کړي، باید د برېتانوي اشرافو او د برېتانیې شاهي کورنۍ حقیقت په غور وکتل شي.

همدا د برېتانیې اشراف دي چې په پرلپسې د برېتانوي نفوذ د پراخو شبکو له لارې د استعماري ځواک چارې پر مخ وړي. د دغو اشرافو نفوذ د برېتانیې دولت له هغو اسنادو ډېر دی چې د کابینې دفتر د وکیلانو له لوري چمتو شوي دي او دا په ګوته کوي چې پارلماني لایحې د شاهي کورنۍ د لوړ پوړو واکمنانو تابع دي او دوی د نویو قوانینو د رد او تاييد صلاحیت لري. د برېتانیې اشراف د داعیانو مجلس، د عوامو مجلس، د کابینې دفتر، د انګلستان کلیسا، لندن ښار، انګلستان دولت، پټو استخباراتي خدمتونه (MI6)، سنډهرست او آکسبریج پلټ فارمونو له لارې خپل نفوذ ساتي.

برېتانوي اشراف د استعماري اقتصادي نظام له جوړوونکو سره، چې د نړۍ ډېره برخه یې په سختو پورونو کې ډوبه کړې ده، مرسته کوي چې غربي پانګوال په پورونو کې د سود له ورکړې څخه ګټه پورته کړي. د دې صنعت مشران د خلیج سیمې په ګډون د اسلامي نړۍ له بډایه زېرمو څخه ګټه پورته کوي؛ د حسادت له امله یې د صنعتي پرمختګ پر وړاندې خنډ ګرځي، استخبارات یې اسلامي امت ته خنډونه جوړوي او د سنډهرست او اکسبريج په څېر ادارو کې له ګمارل شوو سیاسي او نظامي اجنټانو څخه ګټه پورته کوي. په حقیقت کې دا اجنټان د عرب لارنس ډرامې په څېر خپل کارونه پر مخ وړي، چې په لرې پرتو سیمو کې د تاج او تخت د ترلاسه کولو لپاره له ځايي خلکو سره کار کوي.

د پاکستان واکمنان داسې خبرې کوي، چې ته به وایې د هند په نیمه وچه کې نه، بلکې په وینزر ماڼۍ کې اوسېږي؛ د هند نیمه وچه له درېیو پېړیو راهیسې د برېتانوي اشرافو د جنایتونو صحنه ده. د برېتانیا له استعمار وړاندې د اسلام تر واکمنۍ لاندې د هند نیمې وچې د نړۍ د اقتصاد ۲۳٪ برخه جوړوله، دا کچه له ټولې اروپا سره برابره وه. دا شمېره په ۱۷۰۰م کال کې د اورنګ زېب عالمګیر د واکمنۍ پر مهال، ۲۷٪ ته ورسېده؛ خو د برېتانیې له اشغال وروسته تر ۴٪ ټیټه شوه او سلګونه زره کسان له لوږې سره مخ شول. انګریزانو دا سیمه ۱۷۳ کاله لوټ کړه او د نن ورځې معادل ۴۵ ټریلیونه ډالر یې ترې یوړل!

مسلمانان باید د برېتانیې اشراف چې څنګه دي، هسې وپېژني او بیا یې دې د مرګ پر وړاندې غبرګون وښيي. اوسمهال برېتانیا په انحطاط کې ښکېل ده او دا د اسلامي نړۍ لپاره یو غوره فرصت دی چې د مشترک المنافع هېوادونو په ګډون د پوځي او اقتصادي دامونو او له برېتانیې سره د اړیکو له ځنځيرونو ځان خلاص کړي. مسلمانان باید خپلو واکمنانو ته له ښکېلاک سره د مرسته کوونکو په سترګه وګوري او له دوی سره په همدې ډول چلند وکړي. مسلمانان باید هڅه وکړي چې د نبوت پر منهج خلافت دولت بیا تاسیس کړي او نړۍ د امریکا او اروپا له ښکېلاک څخه وژغوري. هغه وخت به بیا نړۍ د جنګي جنایتکارانو او ظالمانو په مرګ خواخوږي نه ښيي. الله سبحانه وتعالی فرمايي: 

(فَمَا بَكَتْ عَلَيْهِمُ السَّمَاءُ وَالْأَرْضُ)

ژباړه: «پر هغوی نه اسمان وژړل او نه هم ځمکې» [دخان: ۲۹]

د حزب التحریرـ ولایه پاکستان مطبوعاتي دفتر

د مطلب ادامه...

د تايوان پر سر د امريکا-چين لانجه

  • خپور شوی په سیاسي

پوښتنه:

د تايوان په تړاو د امريکا-چين لانجې ترشا څه دي؟ د دې لانجې ترشا انګيزې څه دي؟ امريکا ولې تايوان ته  د دې هېواد د استازو جرګې مشرې او کانګرس نورو غړو په سفر، چین راپاروي؟ د چين او امريکا لپاره د دې ټاپو ارزښت په څه کې دی؟ د دې موضوع په تړاو لانجه د جګړې او که د ارامۍ لور ته روانه ده؟

ځواب:

د دې لپاره چې د تايوان د مخ پر زياتيدونکې لانجې، د هغې د انګيزو او پارونو په تړاو وضاحت ورکړو، پر ځینو واقعیتونو پوهېدل مهم دي:

لومړی: امريکا په نړيواله کچه چين خپل لومړی درجه سيال ګڼي. د چين اقتصاد ډېر لوی او د امریکا په پرتله یې وده ډېره چټکه ده. د چین دا اقتصادي وده به په راتلونکو څو کلونو کې امریکا وګواښي. د چين دغه اقتصادي ځواک په نظامي هغه هم بدليدونکی دی؛ د چين نظامي لګښت کال په کال زياتېږي، د ورېښمو لارې پروژې په ګډون زړې او هستوي وړتياوې يې وده کوي، چې دغه چاره په یو شمېر هېوادونو، په ځانګړي ډول اسيا کې د چین سياسي او اقتصادي نفوذ ته لاره هواروي. دا ټول امريکا ته د منلو وړ نه دي، نو د چين پر وړاندې یې سوداګريزه جګړه اعلان کړه او په اسيا کې يې د پوځي ايتلافونو په جوړولو پيل وکړ، چې د چين مخالفت وکړي او د پرمختګ مخه يې ونيسي.

دوهم: تایوان یو پراخ ټاپو دی چې ۳۶۰۰۰ کيلومتر مربع مساحت لري او نفوس یې ۲۴ میليونه دی. تايوان د پرمختللي اقتصاد له امله په نړۍ کې ۲۶مه درجه اقتصادي دولت دی او د برېښنايي چيپونو د صنعت له مخې په نړۍ کې نوم لري. له همدې امله، د هېوادونو د نننيو معيارونو له مخې تایوان يو بشپړ هېواد دی. خو تاريخ ته یې په کتو او دا چې خلک يې چينايان دي او له چين څخه يوازې ۱۴۰ کيلومتره واټن لري؛ چين د يوې باغي سيمې په سترګه ورته ګوري. د سياسي تاريخ له مخې له چين سره د تایوان اړيکې يوه توده موضوع ده، ځکه وروسته تر هغه چې په ۱۹۴۹م کال کې کمونيستانو د چين واګې په لاس کې واخيستې او د چين ملتپالو واکمنانو (د چين ملي ګوند- کومينټګ) ماتې وخوړله، دا خلک تايوان ته وتښتېدل او هلته يې خپله واکمني جوړه کړه. دوه ميليونه چينايان د کمونېست ګوند د مخالفت له امله تايوان ته کډوال شول او تايپي يې خپله پلازمېنه وټاکله. په همدې توګه د چين ملتپالو واکمنانو (له کمونېستانو وړاندې) د تايوان ټاپو تر خپل حاکميت لاندې راوست او له هغه وخت راهيسې امريکا پوځي مرستې ورسره کوي. امريکا په ۱۹۵۵م کې د چين جمهوريت تر نامه لاندې له تايوان سره ګډ دفاعي تړون لاسليک کړ، ځکه امريکا هغه وخت د چين جمهوريت چې کمونېست ګوند پرې حاکم و، په رسميت نه پېژاند. امريکا پرله پسې د تايوان د دفاع په موخه مداخله کړې او چين ته يې د ملګرو ملتونو په امنيت شورا کې دايمي څوکۍ ورکړه.

درېيم: امريکا که څه هم له بیجېنګ سره تر تفاهم وروسته موافقه وکړه چې د ملګرو ملتونو په امنيت شورا کې دايمي څوکۍ دوی (د چين کمونېست ګوند) ته ورکړي او تايوان د ملګرو ملتونو له غړيتوب څخه بې برخې کړي. له هغه وخت راهيسې امريکا د واحد چين سياست تعقيبوي؛ يعنې د تايوان خپلواکي په رسميت نه پېژني، خو دفاعي تړون يې د دې لپاره پرځای دی چې چين د تايوان له الحاق څخه منعه کړي. دې چارې امريکا د تايوان په موضوع کې له تېرو اويا کلونو راهيسې د يوه فعال عنصر په توګه ښکېل کړې. نن ورځ امريکا پرته له دې چې تایوان په رسمیت وپېژني، له دغه هېواد سره د یوه خپلواک دولت په توګه تعامل کوي؛ سياسي، سوداګريزي، اقتصادي او نظامي اړيکې ورسره پالي او پر دې سربېره د امريکايي جنګي بېړيو په مټ ساتنه ترې کوي. امریکا په تايپي کې دفتر لري چې که څه هم د سفارت نوم یې نه دی ورکړی، خو د یوه رسمي سفارت چارې مخ ته وړي.

څلورم: له چین څخه د یوه جلا سیاسي بنسټ په توګه د تايوان په تاریخ کې وضعیت همداسې و. نن ورځ د چين ځواک خورا زيات شوی او په نړيوال ډګر کې يو وتلی دولت دی، دوی په اسيا کې، په ځانګړي ډول په اقتصادي برخه کې پام وړ نفوذ موندلی؛ خو د تايوان لانجه یې د يو باغي دولت په توګه نه ده حل کړې او دا يې يوه لويه کمزروي ده. چين په تېر او اوس کې د تايوان له نظامي ځواک څخه وېره لري او ډاډمن نه دی چې یاد ټاپو به د زور له لارې له ځان سره يوځای کړی شي؛ چین د تايوان پر سر له امريکا سره د جګړې د پېښېدو وېره لري. په اوسني کړکېچ کې امريکا د چين پر وړاندې سخت دریځ خپل کړی، چين په نړيواله کچه پر دې راضي دی چې د نړۍ هيوادونو د تايوان خپلواکي په رسميت نه ده پېژندلې او د «واحد چين تګلاره» يې خپله کړې. پر دې ټولو سربېره، هغه هيوادونه چې امريکايې سياست تعقيبوي، له تايوان سره د يوه خپلواک هېواد په توګه تعامل کوي. په ټوله کې، چين د تايوان شاوخوا د کړکېچ رامنځته کېدو مخه نیولې، ځکه دا کار له نړۍ سره د چين پر سوداګريزو اړيکو سيوری غوړوي. 

پنځم: امريکا د تايوان په موضوع کې چين پاروي، سپکاوی يې کوي او کمزروي يې په ګوته کوي. که چين د امريکا د پاروونکو کړنو پر وړاندې غلی پاتې شي او که د ځان د دفاع په موخه اقدام وکړي؛ په دواړو حالتونو کې تايوان په يوه کړکېچ ورته بدلېږي او پکې ښکېلېږي. چين د پاڼ او پړانګ ترمنځ دی. دا هغه څه دي چې د تايوان د اوسني کړکېچ په تړاو بيان شول. امريکا له کوم قانع کوونکي دليل پرته تایوان ته د امريکا د استازو جرګې د مشرې، نانسي پلوسي سفر اعلان کړ او د دې اعلان له مخې د سفر احتمالي نېټه ۳/۸/۲۰۲۲ وه. چين په غوسه شو او امريکا ته يې خبردار ورکړ چې که پلوسي تايوان ته لاړه، امريکا به يې بيه پرې کړي. بیجېنګ خبرداری ورکړ چې د تايوان په هوايې حريم کې د پرواز له بنديز څخه سرغړوونکې الوتکه ښايي وغورځول شي. (د الشروک ورځپاڼې وېبپاڼه، ۲/۸/۲۰۲۲) امريکا سره له دې هم خپلو پاروونکو کړنو ته زور ورکړ؛ پلوسي د امريکا په يوه پوځي الوتکه کې چې ۱۳ نورو پوځي الوتکو بدرګه کوله، په جاپان کې د امريکا له پوځي بېس څخه پرواز وکړ او د چين له خوا ورپېښېدونکي ګواښ ته يې هېڅ ارزښت ور نه کړ.

شپږم: چين د تايوان په تنګي کې پراخ پوځي مانورونه وکړل، توغندي يې وتوغول او له امريکا څخه یې د واحد چين د پاليسۍ د پيروۍ غوښتنه وکړه چې په ۱۹۷۱ کې یې هوکړه پرې کړې وه. د پلوسي تر سفر وروسته امريکا نورو پاروونکو کړنو ته مخه کړه. د امريکا د کانګرس يو بل غړی تايوان ته لاړ چې د تايوان د دفاع او د چين د ننګولو په موخه د امریکا ژمنتيا په ډاګه کړي. په تايپي کې د امریکا د انسټېټيوټ -چې د واشنګټن د سفارت په توګه کار کوي- د وينا له مخې؛ (یکشنبه، د اګسټ ۱۴مه، د امریکا له کانګرس څخه يو پلاوی تايوان ته را ورسېد). دا کار وروسته تر هغه ترسره شو، چې چین د امريکا د استازو جرګې د مشرې، نانسي پلوسي د سفر په غبرګون کې د تايوان شاوخوا پوځي مانورونه وکړل. (انډېپنډنټ عربي، ۱۴/۸/۲۰۲۲). چين د دې په ځواب کې د تایوان په تنګي کې نوي پوځي مانورونه وکړل او دغه راز امریکا اعلان وکړ چې سمندري او هوايي ځواکونو يې د تايوان په تنګي کې ترانزیتي عملیات ترسره کړل، څو په دې توګه په دغه ځای کې د تګ راتګ ازادي تایید کړي. تايوان د دغو مانورونو پر غبرګون کې ظاهري شورماشور جوړ کړ او پوځي مانورونه يې وکړل چې د چين د بريد پر وړاندې ظاهري غبرګون وښيي. له همدې امله د تايوان کړکېچ د امريکا او چين ترمنځ دی او په لاندې ډول يې خلاصه کولی شو:

۱- چين غوسه دی او د احتمالي جګړې لپاره ځان چمتو کوي. (د چين دفاع وزارت په يوه بېل بيان کې وويل چې د امريکايي پلاوو سفر د چين له حاکميت او ځمکنۍ بشپړتیا څخه سرغړونه ده او دا «د تايوان په تنګي کې د سولې او ثبات له منځه وړونکي په توګه د امريکا اصلي څېره په ډاګه کوي.» هغې زياته کړه چې، «د چين د خلکو د ازادۍ پوځ جګړې ته د چمتو کېدو په موخه خپلې روزنې ته دوام ورکوي؛ په غوڅ ډول له خپل ملي حاکميت او ځمکنۍ بشپړتیا څخه ساتنه کوي او د تايوان د خپلواکۍ، بېلتون او بهرنۍ لاسوهنې هره بڼه به په غوڅ ډول وځپي.» (انډېپنډنټ عربي، ۱۶/۸/۲۰۲۲)).

۲- امريکا خپلو پاروونکو کړنو، له هېوادونو سره د ايتلافونو جوړولو او د چين پر ضد تودو احساساتو پارونې ته دوام ورکوي، (د امريکا د بحري ځواک یوه قوماندان، کارل توماس، سه شنبه، د اګسټ ۱۶مه په سنګاپور کې په يوه ناسته کې ټينګار وکړ چې د چين دا پرېکړه چې د تايوان پر سر توغندي توغوي؛ يو د نه منلو او بې مسووليته کار دی. (انډېپنډنټ عربي، ۱۶/۸/۲۰۲۲)) نوموړي دغه راز د چين پر ضد اسيايي هيوادونه وپارول، د همدغې سرچينې په حواله، هغه زياته کړه: «که تاسې چين ونه ننګوئ، دغه ستونزه به پر يو اصل بدله شي... خلک يې مني. ټول به دا يوه خبره کوي چې د سويلي چين سمندرګی په بشپړ ډول د چين اړوند دی». تر ده وړاندې، د امريکا ولسمشر په ډاګه ویلي و چې که چين بريد وکړي، امريکا به د تایوان تر څنګ درېږي. د امريکا ولسمشر جو بايډن خبرداری ورکړ چې چين د تايوان په موضوع کې له اور سره لوبې کوي او ژمنه يې وکړه چې که چین برید وکړي، د د فاع په موخه به پوځي مداخله وکړي...، له هغه وپوښتل شول چې ايا امريکا به د چین د برید په صورت کې له پوځي اړخه د تايوان دفاع وکړي که نه؛ په داسې حال کې چې د اکراین په مسله کې داسې ونه شول؛ بايډن ځواب ورکړ: «هو... موږ دغه ژمنه کوو.» (بي بي سي، ۲۳/۵/۲۰۲۲). امريکا په تايوان کې د چين پر وړاندې بې شمېره پاروونکې کړنې کوي او چين د تايوان شاوخوا خپل پوځي ځواک ښيي او ګواښوونه کوي. امريکا خپلې جنګي بيړۍ او الوتکې د تايوان تنګي ته راولي او چين د خپل کور په دروازه کې ننګوي. دا کړکېچ خطرناک ګڼل کېږي چې امريکا حالات د لا کړکېچن کېدو لور ته بيايي. امريکا له کلونو راهيسې په اسيا کې له چين سره د احتمالي پوځي ښکېلتيا په موخه خپل ځواکونه بسيجوي. امريکا د چين پر ضد نوي پوځي ايتلافونه جوړوي، لکه؛ له استراليا او بريتانيې سره درې اړخيز ايتلاف (AUKUS). دوی همداراز شته ايتلافونه پياوړي کوي، لکه؛ له جاپان، هند او استراليا سره څلور اړخيز ايتلاف ((Quad. يعنې، امريکا د پوځي ګواښ تر څنګ له اقتصادي ګواښ څخه هم کار اخلي چې لومړی يې تر دوهم ډېر اغېزناک دی.

۳- داسې ښکاري چې چين پوهېږي چې دا اصلاً د تایوان موضوع نه ده، بلکې د امريکا د لويې پاليسۍ اړوند پلانونه دي چې په مټ يې چين مهاروي. ځکه خو چين خپلې پوځي وړتياوې ښيي. د چين پوځ ختيځي قوماندانۍ په یوه اعلامیه کې ویلي: «د چين د خلکو د ازادۍ پوځ د اګسټ پر ۱۵مه د ګډو ځواکونو د چمتوالي په موخه يوه ګزمه ترسره کړه؛ دغه راز یې په سمندرګي کې مانورونه او د تايوان شاوخوا يې پوځي الوتنې وکړې.» (انډېپنډنټ عربي، ۱۴/۸/۲۰۲۲). د چين پوځ دغه راز نن وويل چې تايوان ته نږدې يې مانورونه ترسره کړي چې د دوی په خبره واشنګټن او تايپي ته جدي خبرداری دي، ځکه دوی د تايوان په تنګي کې د سولې او ثبات زيانمنولو په موخه خپلو سياسي چلونو او نیرنګونو ته ادامه ورکوي. د چين پوځ د ختيځې قومندانۍ په وینا؛ د چين د خلکو د ازادۍ پوځ په سمندرګي کې د ډزو جګړه‌ييز تمرينونه او د تايوان شاوخوا پوځي الوتنې ترسره کړې. په ورته وخت کې، د چين دفاع وزارت وويل چې ځواکونه يې د چمتوالي په موخه روزنې ته دوام ورکوي، په کلکه د ملي حاکميت دفاع کوي او د تايوان د خپلواکۍ هره بڼه او بهرنۍ هر ډول لاسوهنې به وځپي. دوی امريکا او په تايپي کې واکمن ډيموکراټ مترقي ګوند ته خبرداری ورکړ چې د چين د مهارولو په موخه تايوان د يوې وسيلې په توګه کارول له ناکامۍ پرته بل څه په لاس نه درکوي. (الجزيره نټ. ۱۵/۸/۲۰۲۲). همدا رنګه، په (۱۷/۸/۲۰۲۲) نېټه، چين خپل ځينې ځواکونه روسيې ته له روسي ځواکونو سره د ګډو تمرينونو ترسره کولو په موخه واستول، چې په دې ډول امريکا وګواښي او ويې پوهوي چې د تايوان په کړکېچ کې روسيه د چین پلوې ده.

اووم: امريکا د تايوان د کړکېچ  د بېلابېلو اړخونه د رامنځته کېدو په مټ غواړي چين د ځان تابع کړي. د يادونې وړ ده چې په دې تړاو څلور مهم موضوعات دا دي:

۱- امريکا د چين له اقتصادي جګړې څخه ويره لري ځکه د چين اقتصاد ډېر ځواکمن دی. خو له پوځي اړخه امريکا تر چين زياته پياوړې ده او له چين سره له پوځي ښکېلتيا وېره نه لري؛ نو د تايوان په موضوع کې د امريکا پاروونکو کړنو ته بايد د يوې روښانه او ډېرې جدي امريکايي تګلارې په سترګه وکتل شي، چې غواړي د اقتصادي ډګر پرځای په پوځي ډګر کې له چين سره ښکېله شي. په داسې حال کې چې امريکا په بشپړه توګه له پوځي اړخه له چين څخه پیاوړې ده. دا چې روسيه په اوکراین کې ښکېله ده، ښايي له چين سره د تايوان د جګړې د پېښېدو په صورت کې پوځي مرسته ونه شي کړی. په دې جګړه کې به د اټومي وسلو کارول لرې خبره وي.

۲- که امريکا په دې کې بریالۍ شي چې چین د تایوان په مسله کې راښکېل کړي؛ نو له خپلو متحدینو سره به پر چين اقتصادي بنديزونه ولګوي؛ لکه پر روسيه یې چې ولګول. له دې سره به د چين اقتصادي زبرځواکي له ستر ګواښ سره مخ شي او د چین په مهارولو به د امریکا هیله پوره شي. پر تایوان د برید په صورت کې پر چين دغه احتمالي بنديزونه د امريکا د ډېر نفوذ لامل کېږي او په چين کې به شتمن پوړ ته -چې د کمونېست واکمن ګوند جګ‌پوړي غړي دي- ډېر دردوونکي تمام شي. که د يادو متنفذينو ګټې په پراخه کچه زيانمنې شي، نو د چين کمونېست ګوند دننه به د امریکا لپاره د پنځمې ستنې په توګه کار پيل کړي!

۳- دغو ټولو خبرو ته په کتو، بيخي روښانه ده چې امريکا غواړي وضعیت ترینګلی شي او خبره لویه کړي. دا هم روښانه ده چې اکراین ته د امريکا پام له چين سره د ترینګلتيا په کمولو کې مرسته نه ده کړې. د دې خبرې د لا روښانه کولو لپاره، امريکا له پولنډ څخه وغوښتل چې اوکراين ته د شوروي لخوا جوړې شوې ميګ (MiG) جيټ الوتکي چمتو کړي، پولنډ د دې په بدل کې له امریکا څخه د ايف-۱۶ امریکایي جيټ الوتکې وغوښتې. امريکا يې په ځواب کې وويل چې امريکايي کمپنۍ د تايوان لپاره د جنګي الوتکو په چمتو کولو بوختې دي؛ يعنې د اوکراين جګړې له چین څخه د امريکا پام نه دی اړولی. دا و د تایوان د کړکېچ اوسنی وضعیت او انګېزه یې.

۴- که دغه کړکېچ د جګړې يا اوربند لور ته ولاړ شي، ډېر احتمال شته چې چين د خپل کور په خوله کې په کړکېچ کې ښکېل کړي، چې په دې سره چين له روسيې سره د اوکراين په جګړه کې مرسته نه شي کولی. د دې په پايله کې، امريکا د روسيې لپاره په اوکراين او د چين لپاره په تايوان کې کړکېچ رامنځ ته کوي او ګټه به يې د دواړو لورو په کمزوري کولو سره امريکا ته رسېږي. که روسيه او چين پوه نه شي چې امريکا په اوکراين او تايوان کې کړکېچونو ته په لمن وهلو سره د دوی پر وړاندې څومره خطرناکه لوبه پيل کړې ده؛ موږ وايو د جګړې د پېښېدو ډېر احتمال شته، يا لږ تر لږه ممکن اخ وډب وشي، ځکه د پوځونو له بسيج کولو تر پاروونکو اقداماتو پورې، په دې قضيه کې هر ډول غلطه محاسبه د جکړې احتمال رامنځته کوي.

اتم: د پایلې په توګه ، زبرځواکو هېوادونو نننۍ نړۍ اغېزمنه کړې؛ عدالت او نېکۍ ته هيڅ ارزښت نه ورکوي او سر تر پايه په بې عدالتۍ او شرارت کې ډوب دي. د يادو هيوادونو ګټې که د ځمکې په فاسدولو او د خلکو په له منځه وړلو سره ترلاسه کېږي، له شک پرته چې دا کار کوي؛ که يې ګټې د وينې په تويولو، فساد خپرولو او ګمراهۍ دودلو سره ترلاسه کېږي، دا کار هم هرو مرو کوي. که تېر تاريخ ته پام وکړو، فارس او روم «لوی دولتونه» وو، خو مومنانو فتحه کړل. نن به هم مومنان دغه دولتونه له منځه يوسي او د رسول الله صلی الله عليه وسلم پر منهج راشده خلافت به بيا تاسيس کړي، الله سبحانه وتعالی نړۍ ته د ښېګڼې  ورکولو اراده لري. 

[... وَيَقُولُونَ مَتَى هُوَ قُلْ عَسَى أَنْ يَكُونَ قَرِيباً] [الإسراء:۵۱]

ژباړه: «... دوی وايي دا به كله وي؟ ته ووایه، شاید چې نیږدې وي»

 

 

د مطلب ادامه...
Subscribe to this RSS feed

اسلامي خاورې

اسلامي خاورې

غربي هېوادونه

ټول لینکونه

د پاڼې برخې