تیونس سے لے کر بنگلہ دیش تک، پوری مسلم دنیا میں جب بھی لوگوں کا غم و غصہ انتہا کو پہنچتا ہے، تو استعماری مغرب فقط ''چہرے کی تبدیلی‘‘ اور کچھ قوانین میں ظاہری ردوبدل کے ذریعے موجودہ کرپٹ نظام کوبرقرار رکھنے کی کوشش کرتا ہے۔ چنانچہ یہ واضح طور پر نظر آ رہاہے کہ پاکستان کی سیاسی اور عسکری قیادت میں موجود غدار، اپنے مغربی آقاؤں کو خوش کرنے کے لیے، ''ق لیگ‘‘کی مانند ایک نئی ''کنگز پارٹی‘‘بنانے کے لیے سرگرمِ عمل ہیں تاکہ امت میں اس نظام کے خلاف موجود غم وغصے کوٹھنڈا کیا جائے۔ جبکہ یہ سرمایہ دارانہ نظام ہی ہے جو کہ پچھلی چھ دہائیوں سے پاکستان میں لوگوں کی ابتر صورتحال کی اصل وجہ ہے ،اور جسے جمہوری حکمران اور فوجی آمر دونوں مسلسل نافذ کرتے رہے ہیں۔ چنانچہ جب تک اِس کرپٹ نظام کو اُکھاڑ کراِس کی جگہ خلافت کے نظام کو نافذ نہیں کیا جاتا ، تب تک کوئی حقیقی تبدیلی رونما نہیں ہوگی۔ لہٰذا حزب التحریر اُس ریاستِ خلافت کا ایک مختصر جائزہ آپ کے سامنے رکھنا چاہتی ہے ، جو نہ صرف اِس دنیا میں آپ کو ظلم سے نجات دلائے گی بلکہ آخرت میں بھی اللہ سبحانہ تعالیٰ کے غیض وغضب سے بچاؤ کا ذریعہ بنے گی۔
موجودہ سرمایہ دارانہ حکومتی نظام اِس اصول کی بنیاد پر قائم ہے کہ انسان ہی اقتدارِاعلیٰ کا مالک ہے اور اُسی کو یہ حق حاصل ہے کہ وہ اپنی مرضی کے قانون بنائے۔ آمریت اور جمہوریت دونوں میں ایساہی ہے،پس گفتگو اور بحث کو اِن دونوں نظاموں تک محدود کرنے کا ہرگزکوئی فائدہ نہیں۔ کیونکہ آمریت اور جمہوریت دونوں میں پاکستانی قوانین استعماری قوتوںیا پھر سیاسی اور عسکری قیادت میں موجود اُن کے ایجنٹوں کے مفادات کے تحفظ کے لیے بنائے جاتے ہیں۔ اِس کے برعکس خلافت کے اندر آئین اور تمام تر قوانین صرف اور صرف قرآن اور سنت سے اخذ کئے جاتے ہیں۔ چنانچہ خلافت میں خلیفہ یاپھر مجلسِ امت میں موجود منتخب مرد اور خواتین قوانین نہیں بنائیں گے، جیسا کہ آج کی جمہوری اسمبلیوں میں ہوتا ہے۔ بلکہ مجلسِ امت میں موجود منتخب نمائندوں کا کام اسلام کی بنیاد پر حکمرانوں کا محاسبہ کرنا اور اُنہیں نصیحت کرنا ہوتا ہے۔ پس خلافت ایک ایسا نظا م ہے جس میں اقتدارِ اعلیٰ کا مالک صرف اللہ کی ذات ہوتی ہے۔ کیونکہ اللہ سبحانہ تعالیٰ نے مسلمانوں کے لیے قطعی طور پربیان کر دیا ہے:
(اِنِ الْحُکْمُ اِلَّا لِلّٰہِ)
''حکم صرف اللہ ہی کے لیے ہے‘‘ ( یوسف:67)۔
اِسی طرح سرمایہ دارانہ معاشی نظام صرف استعماری طاقتوں اور پاکستان کی سیاسی اور عسکری قیادت میں موجود اُن کے ایجنٹوں کو ہی فائدہ پہنچاتا ہے جبکہ کروڑوں لوگوں کا استحصال ہوتا ہے اور ان پر ظلم ڈھایا جاتا ہے۔ ''آزادیِ ملکیت ‘‘ کے نام پر یہ نظام استعماری قوتوں اور اُن کے ایجنٹوں کو اس بات کی اجازت دیتا ہے کہ وہ عوامی اثاثہ جات کے مالک بن جائیں اور پھر یہی لوگ اِن عوامی سہولیات کو ایسی قیمت پر فروخت کرتے ہیں جو عوام کی قوت خرید سے باہر ہوتی ہے،اور یوں عوام ظلم کی چکی میں پستے رہتے ہیں۔ توانائی کا موجودہ بحران اِس کی فقط ایک مثال ہے۔ پاکستان کے توانائی پیدا کرنے والے ( پاور جنریشن ) پلانٹس کے ساتھ ساتھ گیس اور تیل کے شعبوں کی نجکاری کی جاچکی ہے اور اُن کا کنٹرول استعماری قوتوں کی کمپنیوں یا اُن کے ایجنٹوں کے ہاتھوں میں ہے۔ اِس کے برعکس خلافت میں عوامی اثاثہ جات کی نجکاری نہیں کی جاسکتی، کیونکہ ان اثاثوں کے حقیقی مالک عوام ہوتے ہیں ، جبکہ ریاست لوگوں کی نمائندہ کے طور پر صرف اِن عوامی سہولیات کو لوگوں تک پہنچانے کاانتظام و انصرام کرتی ہے۔ رسول اللہ ﷺکا ارشاد ہے:
((المُسلمون شُرَکَاءُ فِیْ ثَلَاثٍ اَلْمَاء وَالْکِلَاء وَالنَّار))
''مسلمان تین چیزوں میں شراکت دار ہیں، پانی، چراگاہیں اور آگ(توانائی)‘‘ (مسند احمد)۔
اِس حدیث کی بنا پر توانائی کے تمام وسائل، جن میں گیس اور تیل کے کنویں، کوئلے کی کانیں اور بجلی پیدا کرنے والے پلانٹس بھی شامل ہیں، کی کسی صورت نجکاری نہیں کی جاسکتی۔ چنانچہ خلافت اِن عوامی ملکیت کی چیزوں پرنہ تو کوئی ٹیکس لگائے گی اور نہ ہی اِن چیزوں پر کوئی منافع حاصل کرے گی۔ یوں بجلی اور تیل کی مصنوعات کی قیمتوں میں نمایاں کمی واقع ہوگی ،جس کے نتیجے میں لوگوں کی اکثریت سکھ کا سانس لے گی اور صنعت اور زراعت کے شعبوں کو ایک نئی زندگی ملے گی۔ مزید برآں، اسلام اِس بات کی بھی اجازت دیتا ہے کہ اِن عوامی ملکیت کی چیزوں کو بیرونِ ملک ایکسپورٹ کرکے اس سے حاصل ہونے والی آمدنی کوبیت المال میں رکھا جائے اور پھراِس آمدن کو ریاستِ خلافت کے تما م شہریوں پر رنگ و نسل، زبان اور مذہب کی تفریق کے بغیر خرچ کیا جائے ۔
ریاستِ خلافت کے آمدنی کے ذرائع بھی موجودہ سرمایہ دانہ نظام سے یکسر مختلف ہوتے ہیں۔ رسول اللہ ﷺکا ارشاد ہے:
((لَا ےَدْخُلِ الْجَنَّۃ صاحب مکَس))
''ٹیکس لینے والا جنت میں داخل نہیں ہوگا‘‘ (مسند احمد)۔
اِس حدیث کے مطابق کسی کے لیے یہ جائز نہیں کہ وہ لوگوں پر اپنی من مرضی کے ٹیکس عائد کرے۔ چنانچہ خلافت میں بیت المال کی آمدنی کے ذرائع صرف اللہ سبحانہ تعالیٰ کی طرف سے مقرر کردہ ہوتے ہیں۔ پس خلافت میں حکمرانوں کو یہ ظالمانہ ''حق ‘‘حاصل نہیں ہوتا کہ وہ جب چاہیں اور جتنا چاہیں لوگوں پر ٹیکس عائد کردیں۔ جبکہ پاکستان میں نافذ موجودہ نظام میں جمہوری حکمران ہوں یا ڈکٹیٹر،دونوں کو اِس بات کا مکمل اختیار حاصل ہوتاہے کہ وہ ایسے ذرائع سے آمدن (ریونیو) اکٹھی کریں جن کی اسلام اجازت نہیں دیتا ۔ اس حد تک کہ پچھلے 60سالوں سے پاکستان کے ایجنٹ حکمرانوں نے ٹیکسوں میں مسلسل اضافہ کیا یہاں تک کہ آج جی ایس ٹی اور دیگر بلواسطہ ٹیکسوں (indirect tax)کا تناسب کُل آمدنی کے 50فیصد سے تجاوز کر چکا ہے ، جس نے پاکستان کے کروڑوں لوگوں کو ابتری سے دوچار کر رکھا ہے۔ اسلام میں لوگوں کی ذاتی ملکیت کو حرمت و تحفظ حاصل ہے ،پس ریاستِ خلافت ''ٹیکس‘‘ کے نام پر اپنے شہریوں کی ملکیتوں پرڈاکہ ڈال کر ان کا خون نہیں نچوڑ سکتی ۔ یہ صرف اللہ سبحانہ تعالیٰ کی ذات ہی ہے جسے یہ طے کرنے کا اختیارہے کہ کونسا ٹیکس لیا جاسکتا ہے اوریہ ٹیکس بھی صرف اُنہی لوگوں سے وصول کیے جاتے ہیں جو اُنہیں ادا کر سکتے ہوں۔ اسلام کا اموال اکٹھا کرنے (revenue (collectionکااپنا ایک منفردنظام ہے ، جس میں عوامی اثاثہ جات جیسے گیس اور تیل سے ہونے والے اموال، زرعی پیداوار سے حاصل ہونے والی آمدنی جیسے عشر اور خراج اور صنعتی پیداوار پر عائد ہونے والی زکوٰۃوغیرہ شامل ہے۔ ان ذرائع سے حاصل ہونے والے فنڈ کولوگوں پر ظلم کئے بغیر اُن کے امور کی دیکھ بھال پر خرچ کیا جائے گا۔
صرف خلافت ہی خارجہ پالیسی میں حقیقی تبدیلی لائے گی ۔ اسلام کے قوانین کے نفاذکا مطلب یہ ہے کہ وہ حربی ممالک جو مسلمانوں کے ساتھ حالتِ جنگ میں ہیں،جیسے امریکہ، برطانیہ، اسرائیل، انڈیا اور روس وغیرہ ، اسلامی علاقوں میں موجودان کے تمام سفارت خانوں اور قونصل خانوں کو بند کردیا جائے گا۔ یوں مسلمانوں کے خلاف اُن سازشوں کا خاتمہ ہوسکے گا جو دشمن ریاستوں کے ان سازشی اڈوں سے جنم لیتی ہیں۔ مزید برآں خلافت پانامہ سے لے کر وینزویلا تک اور تھائی لینڈ سے لیکر کوریا تک غیر مسلم ریاستوں کو بھی اِس بات پر اُبھارے گی کہ وہ مغربی استعمار کے ظلم کے خلاف عالمی بغاوت کا حصہ بنیں۔ اور اِس کے ساتھ ساتھ خلافت پوری دنیا کے سامنے اسلام کی سچی ہدایت کو بھی پیش کرے گی ۔
صرف خلافت ہی داخلہ پالیسی میں حقیقی تبدیلی لائے گی۔ موجودہ جمہوری نظام میں دیگر مسلم ریاستوں کو بیرونی ممالک کے طور پر دیکھا جاتا ہے اور ہر ملک اپنی الگ کرنسی،سرحدوں،خزانے اور فوج کا مالک ہوتا ہے۔ اِس کے برعکس خلافت کے قیام کے پہلے روز سے ہی خلیفہ تمام مسلم سرزمینوں کو ایک کرنے کا کام شروع کردے گاتاکہ یہ علاقے دنیا کی سب سے بڑی اور سب سے زیادہ وسائل رکھنے والی ریاست کی شکل اختیار کر لیں،وہ ریاست کہ جس کی فوج ایک ہوگی، اُس کی سرزمین ایک ہوگی اور اُس میں رہنے والے لوگ نسل اور مسلک سے قطع نظر ایک امت ہونگے اور اُن کا بیت المال اور وسائل بھی ایک ہوں گے۔
خلافت اپنے تمام شہریوں کے جان، مال اور عزت کی حفاظت کرے گی خواہ وہ مسلمان ہوں یا پھر غیر مسلم۔ غیر مسلموں کو اِس بات کی اجازت ہوگی کہ وہ ذاتی معاملات مثلاً شادی اور مذہبی رسومات میں اپنے مذہب کے مطابق عمل کریں۔ اِسی طرح عورتوں کو اِس بات کی اجازت ہوگی کہ وہ مرد اور عورت کے درمیان تعلقات اور لباس سے متعلق اسلام کے احکامات پر عمل کرتے ہوئے اپنی پسند کا پیشہ اختیارکریں جیسا کہ شعبۂ تعلیم، انجینئرنگ، میڈیکل، سیاست، میڈیا، عدلیہ وغیرہ۔
اسی طرح صرف اسلام کے عدالتی نظام کے ذریعے اسلامی قوانین کے نفاذ سے ہی معاشرے میں عدل و انصاف قائم ہوگا۔ پاکستان میں رائج انگریز کے چھوڑے ہوئے عدالتی نظام سے کبھی بھی انصاف نہیں آسکتا۔ موجودہ نظام میں استعماری غلبے کے خاتمے کی کوشش کرنااورخلافت کے قیام کی پکاربلند کرنا ایک جرم ہے، جس کی سزا ایجنسیوں کی طرف سے اغواء یا پھر جیل کی صعوبتیں ہیں، جبکہ دوسری طرف یہ نظام استعمار کی موجودگی کا تحفظ ایک فرض کی مانند کرتا ہے۔ اس نظام میں جزیہ یا خراج کی عدم ادائیگی کوئی جرم نہیں لیکن سود کی عدم ادائیگی پر ایک شخص کو جیل بھیجا جا سکتا ہے۔ حتیٰ کہ ایک آزاد جج بھی اس بات پر مجبور ہوتا ہے کہ وہ پاکستان میں نافذ کفریہ قوانین کے مطابق ہی فیصلے دے۔ خلافت کے اندر تمام افراد قانون کے سامنے برابر ہوتے ہیں اور خلیفہ سمیت کسی کو استثنیٰ حاصل نہیں ہوتا۔ خلافت میں ایسے قوانین کی کوئی گنجائش نہیں ہوتی جو حکومتی طبقے کی لوٹ مار اور ظلم کو تحفظ فراہم کرتے ہیں، جیسا کہ اس نظام میں NROکے ذریعے کیا گیاہے ، کیونکہ خلافت میں اللہ سبحانہ تعالیٰ کے علاوہ کوئی قانون ساز نہیں ہوتا۔
یہ اسلام کے بابرکت قوانین کی ایک جھلک ہے ،جنہیں خلافت جلد ہی نافذ کرے گی، انشاء اللہ !
اے مسلمانانِ پاکستان!
آپ کے سامنے ایک طرف مغربی استعماری طاقتیں اورپاکستان کی سیاسی اور عسکری قیادت میں موجود غدار ہیں جواِس بات کی بھرپورکوشش کررہے ہیں کہ ایک نئے جمہوری الیکشن کے ذریعے اِس تعفن زدہ اورگرتے ہوتے ہوئے نظام کو بچایا جائے،جبکہ دوسری طرف آپ کے سامنے حزب التحریرہے جس نے پچھلی چھ دہائیوں سے اِس امت کوتیار کیا ہے یہاں تک کہ یہ امت اب اسلام اور خلافت کی آواز بلند کر رہی ہے، اور اِس حزب نے 190شقوں پر مشتمل ریاستِ خلافت کا آئین بھی تیار کررکھا ہے تاکہ اُسے خلافت کے قیام کے آغاز ہی سے نافذ کردیا جائے ۔ آپ اس بات کو ذہن نشین کر لیں کہ موجودہ جمہوری سیٹ اَپ کے ذریعے کبھی بھی اسلام نافذ نہیں ہوسکتاکہ جس کے اندر اسلام کا نفاذ استعماری قوتوں اور اُن کے ایجنٹوں کی خواہشات کے رحم وکرم پرہو۔ پس آپ کے اوپر لازم ہے کہ آپ اِس کفریہ نظام سے منہ موڑ لیں اور خلافت کے قیام کے لیے حزب التحریرکی پیش قدمی کا حصہ بن جائیں۔ اوریہ آپ پر ہے کہ آپ اس نظام کے تحت کسی بھی الیکشن کو مسترد کردیں اور پاکستان کی مسلح افواج میں موجود مخلص افسران سے مطالبہ کریں کہ وہ خلافت کے قیام کے لیے حزب التحریرکو نُصرۃ فراہم کریں۔
یقیناًخلافت کے قیام کے ذریعے اللہ سبحانہ تعالیٰ کے نازل کردہ سچے دین کا نفاذ نہ صرف پوری امت کے لیے خوشحالی لے کر آئے گا بلکہ دنیا بھر میں انسان کے بنائے ہوئے نظاموں کے ظلم کی چکی میں پسنے والے لوگوں کے لیے اُمید کی مضبوط کرن ثابت ہو گا۔ایک ایسے وقت میں جب پہلے ہی لندن اور نیویارک میں ہزاروں لوگ ظالمانہ سرمایہ دارانہ نظام کے خلاف سڑکوں پر نکلے ہوئے ہیں، یہی وہ وقت ہے کہ ظالمانہ دورِ حکومت کا خاتمہ کردیا جائے اور خلافت کا قیام عمل میں لایا جائے۔ رسول اللہ ﷺ کا ارشاد ہے:
((ثم تکون ملکاً جبریۃً فتکون ما شاء اللّٰہ أن تکون، ثم یرفعھا إذا شاء أن یرفعھا،ثم تکون خلافۃً علی منھاج النبوۃ))۔
''پھرظالمانہ حکمرانی کا دور ہوگا ،تو وہ باقی رہے گی جب تک اللہ چاہے گا،پھر وہ اسے اُٹھا لے گا جب وہ چاہے گا،پھر نبوت کے نقشِ قدم پردوبارہ خلافت قائم ہوگی ‘‘(مسند احمد)
