خبر

د اګيسټ په ۱۲مه د تاجکستان جنوبي سیمې (فانج) اوسېدونکو، پر سیمه ییزو چارواکو له دې امله لاریون وکړ، چې د حجاب او ږيرې پر ضد راوپورته شوي وو. لاریون والو له سیمه ییزو چارواکو وغوښتل چې، پر ږېره لرونکو سړیو او حجاب لرونکو ښځو ژر تر ژره یرغل ودروي.

خلکو وویل: «څوک چې زموږ د مېرمنو لباس ته لاس اوږدوي او ږېرې مو په زور خريي، ملا يې ماتوو.»

د ځوانانو د سیاست ادارې رییس په فانج (د ګورنو بدخشان خود مختاره سیمه) کې  په یوه ويډیويي پیغام کې د یوې ځانګړې ډلې له جوړښت خبر ورکړ، چې ږېره لرونکي کسان پرې نږدي.

د فلم مسوول د خبرو په وینا: «د ږېرې اوږدول او  ډارونکي کول زموږ د ځوانانو لپاره ښه نه دي. زموږ  ځوانان ږېرې ته څه اړتیا لري؟ موږ یو ځل مخکې هم له ږېرورو ځورېدلي یو.»

تبصره

د تاجکستان په ښارونو، کلیو، عمومي ځایونو، سړکونو او د لېږد ـرا لېږد په عمومي ځایونو کې دغه ډول کړنې ترسره شوې دي. حجاب لرونکې ښځې او ږېره لرونکي ځوانان هلته نیول شوي او ټولې دولتي دستګاوې له یادو اسلامي صفاتو سره مبارزه کوي. له امنیتي چارواکو او د پولیسو له افسرانو نيولې تر پوهنې وزارت، د ښځو له کومېټې او د ځوانانو چارو تر کومېټې پورې داسې چلند کوي.

د امنیتي ځواکونو له روحي او جسمي فشار سره سره، خلکو د چارواکو پر ضد په ټول تاجکستان کې  لاریونونه  وکړل. په داسې حال کې  چې ډېر څه  شخصي و،  خو له دې سره  خلکو مخالفت وښود او په فانج سیمه کې دغه ډول کړنې ترسره شوې. خلک د خپل دین د دفاع  په موخه را پورته شول او د وېرې لاملونه يې با بېزه وګڼل.

دغه کړنه باید د تاجکستان ټولو بچیانو ته یو مثال وي چې له مېرمنو، خویندو، میندو او دين څخه يې ساتنه وکړه. د دولت د دین ستېزه کړنو او له اسلامي ارزښتونو د تاجکانو لیرې کولو پر وړاندې د خلکو درېدل دا ښيي، چې لا هم هلته اسلام ژوندی دی.  

په یاد ولرئ! د ۲۰۱۹م، په ژمي کې موږ ولیدل چې تاجکانو څرنګه د رحمانوف د رژیم پر وړاندې د ږېرې او حجاب د منع کولو په اړه درېځ څرګند کړ؛ وروسته يې ټولې نړۍ ته ویډیويي پیغامونه ولېږل او له هغوی څخه يې وغوښتل چې د رژيم د اسلام ضد سیاستونو پر وړاندې خپل لاریونونه جاري وساتي، هغه لاسپوڅی رژيم چې د خپلو بادارانو؛ غرب او روسیې په وسیله د خپلو ګټو د خوندیتوب په موخه جوړ شوی. داسې کسان له بېلا بېلو لارو وېروي او مخه یې نیسي؛ هغه کسان چې صادقانه له اسلام او د هغه له ارزښتونو څخه ننګه او دفاع کوي.

خو کله چې مسلمانان یوځای شي او  ټولیز عمل وکړي، جنایتکار رژیم پرېشانه کېږي او کوم ځواک نه ورته پاتې کېږي. الله سبحانه وتعالی فرمايي:

﴿إِنَّمَا ذَلِكُمُ الشَّيْطَانُ يُخَوِّفُ أَوْلِيَاءَهُ فَلَا تَخَافُوهُمْ وَخَافُونِ إِن كُنتُم مُّؤْمِنِينَ﴾

[آل عمران: 175]

ژباړه: دا یوازې شیطان دی چې تاسو له خپلو ملګرو وېروي، که تاسو مومنان وئ له هغوی څخه مه وېرږئ له ما ووېرېږئ.

لیکوال: فردوس سليمزودا

ژباړن: الهام پردېس

د سیکولرېزم ايډیالوژي افشا شوه، اسلام یې رښتینی بدیل دی

موږ په داسې وخت کې ژوند کوو چې درواغ، ناسم معلومات او بې اساسه تورونه، د ولسمشرانو او لومړي وزیرانو لپاره ډېر عادي دي او هره ورځ  د مهمو رسنیو له لوري په بې شرمانه توګه خپرېږي. 

د پېړۍ له پیل راهیسې د پانګوال نظام مشران او بانګدارن د جعلي استخباراتو او ناسمو مالي معاملاتو له امله افشا شوي دي او د ناقانونه جګړو او نړیوال مالي بحران لامل ګرځېدلي دي. په وروستیو کې لندن د پيسو مینځلو د اصلي مرکز په توګه په داسې حال کې ظهور وکړ، چې هر ځای له نظام څخه اغیزمن دی او د شتمنو کسانو ملاتړ کوي.

د کرونا ویرس پر وړاندې فاسد غبرګون له دوکې ډک دی. عادي وګړي غواړي پوه شي چې نامسووله او هغه مشران چې د ځان په خدمت لګيا دي، دوی ته کومه بدبختي رامنځته کوي.  دوی له لسیزو راهیسي له قدرت څخه ناوړه ګټې اخیستنې ته دوام  ورکړئ.

د پانګوال نظام ملاتړي په لاندې اصولو باور نه کوي: دوی باید د نورو لږ امتیاز لرونکو خلکو له لوري وڅارل شي. جانسن ګواښ وکړ چې لاسلیک شوي نړیوال تړونونه به مات کړي او همدارنګه ټرامپ ګواښ وکړ چې که د نوامبر ټاکني ونه ګټي نو د واک سوله ییز لېږد ته به زړه ښه نه کړي. د شتمنو او بېوزلو نظام ټوله نړۍ د ويجاړېدو پر لور یوه ناوړه سفر ته اړ کوي، چې یوه ډله یې پر بله اغیزه کوي او شتمن کسان به تر دې ډېره شتمني تر لاسه کړي.

دا هېڅ د حیرانتیا خبره نه ده چې خلک ډېر وېشل شوي او له بهرنیانو او مهاجرینو سره په ښکاره دښمني کوي. پانګوال نظام په هر ځای کې پاتې راغلی، د دوی پاپولیست مشران په ډېرې لیوالتیا سره د وخت پېرودلو لپاره هڅه کوي، د قربانۍ د ګډوري په لټه کې دي، په داسې حال کې چې دا نامعقول دی. په حقیقت کې په فرانسه کې میکرون اعلان کوي، چې هغه د اسلام له خوا ګواښل کېږي او دا یوه ستونزه ګڼي.

د دولت او رسنیو  ګډون خلک دومره ګمراه کړي، لکه د برېټانیا محافظه کار ګوند چې ډېری غړي په درواغو پر دې باور کوي؛ په هغه ځای کې چې مسلمانان اوسیږي غیر مسلمانان نه شي ورتللای. په خواشینۍ سره ډېرو خلکو ادعا کړې، چې دوی د اسلام له خوا ګواښل کېږي.

د پانګوال نظام تسلط پای ته رسيږي. الله سبحانه وتعالی یې ناکامي په ډاګه کړه. ناڅاپه د بدیل نظام په اړه ډېرې خبرې شته؛ ان د انګلستان حکومت هڅه کوي، چې په ښوونځيو کې پر هغو ادبیاتو بندیزونه ولګوي، چې پر پانګوال نظام نیوکه کوي.

اوس د مسلمانانو لپاره فرصت دی، چې نړۍ ته اسلام وړاندې کړي، تر څو د ټولو خلکو لپاره خپل عادلانه نظام روښانه کړي او هغوی ته مفصلې اقتصادي حلارې، سوله او امنیت چې یوازې د خالق له لوري نازل شوي او هغه نظام رامنځ ته کړي، چې  زړه او ذهن پرې قناعت کولای شي.

موږ تاسو ته بلنه درکوو چې د حزب التحریرـ انګلستان په انلاین نړیوال کنفرانس )د اسلامي نړۍ نظم راوګرځوئ( کې ګډون وکړئ.

ویناوال به لاندې موضوعات تر پوښښ لاندې راولي:

ـ له ناورغۍ څخه تر BLM پورې: بشریت په ډېر شدت سره د یو بدیل په لټه کې دی

ـ نوی اقتصاد ۱٪ خدمت هم نه کوي

ـ د خلافت نظام؛ د خلکو پاملرنه

ـ پر ځمکه د اسلامي رهبرۍ تاسیسول او زموږ مسوولیت

وخت: د ۲۰۲۰م، د اکتوبر ۳۱مه، د شنبې ورځ، د ګرنويچ په وخت د ماسپښين ۲:۰۰ بجې

دلته نوملیکنه وکړئ:

یحی نسبت

د حزب التحریرـ انګلستان مطبوعاتي استازی

(ژباړه)

پوښتنه:

السلام‌علیکم‌ورحمت‌الله‌وبرکاته!

ښاغلی امیر صاحب!

موږ د حزب التحریر ځوانان، په زندان کې یوه ستونزه لرو، موږ په دې پوهېږو  چې هغه دارو او عطر مردار دي، چې له شرابو جوړ شوي دي. خو په زندان کې چې په کوم امام پسې لمونځ کوو، له همدا ډول عطرو استفاده کوي. دغه راز د داسې عطرو د حلال والي په اړه ځینې دلایل هم وړاندې کوي. موږ په دې کې شک لرو چې ایا په دغه امام پسې لمونځ وکړو او که نه؟ ښاغلی امیر صاحب! موږ واضیح ځواب ته اړتیا لرو او ستاسو د ځواب په تمه یو. جزاک الله خیر!

ځواب:

 وعليكم‌السلام‌ورحمة‌الله‌وبركاته!

له شک پرته په دغه امام پسې، چې له داسې عطرو استفاده کوي چې شراب او الکول پکې ګډ دي، سم دی. ځکه په هغه مسلمان پسې لمونځ روا دی، چې د حرامو مرتکب ګرځي، البته امام ګنهکاریږي. د لاندې دلیل پر اساس: بخاري له ابوهریره رضی الله عنه څخه روایت کړی، چې رسول الله صلی الله علیه وسلم وفرمایل:

«يُصَلُّونَ لَكُمْ، فَإِنْ أَصَابُوا فَلَكُمْ، وَإِنْ أَخْطَئُوا فَلَكُمْ وَعَلَيْهِمْ»

ژباړه: هغه څوک چې تاسو ته لمونځ درکوي، که یې ښه کار وکړ، ستاسو په ګټه دی او که یې ناوړه کار وکړ، ستاسو په ګټه او د خپل ځان په زیان به یې شي.

 "فلكم وعليهم" یعنې تاسو ته به د لمانځه اجر او هغه ته د ګناه سزا ورکړل شي.

مسلم له عبدالله بن صامت او هغه له ابوذر څخه رانقل کړي، چې رسول الله صلی الله علیه وسلم هغه ته وفرمایل:

«كَيْفَ أَنْتَ إِذَا كَانَتْ عَلَيْكَ أُمَرَاءُ يُؤَخِّرُونَ الصَّلَاةَ عَنْ وَقْتِهَا؟ - أَوْ - يُمِيتُونَ الصَّلَاةَ عَنْ وَقْتِهَا؟» قَالَ: قُلْتُ: فَمَا تَأْمُرُنِي؟ قَالَ «صَلِّ الصَّلَاةَ لِوَقْتِهَا، فَإِنْ أَدْرَكْتَهَا مَعَهُمْ، فَصَلِّ، فَإِنَّهَا لَكَ نَافِلَةٌ»

ژباړه: یعنې هغه وخت به په څه حال کې وې، چې پر تا داسې امرا حاکم وي، چې لمونځ ناوخته کوي. راوي وایي: ما ورته وویل: ماته څه هدایت کوئ؟ ویې فرمایل: لمونځ دې په وخت سره وکړه او که چېرې له هغوی سره یو ځای شوې بیا هم لمونځ وکړه، دا به ستا لپاره نفل شي.

د دې حدیث مانا دا ده، چې که چېرې ظالم حاکمان لمونځ په خپل وخت سره وکړي، تاسو یې هم پسې وکړئ، لمونځ مو صحیح کېږي.

باید په دې هم پوه شو چې حنفیانو او شافعيانو ویلي؛ چې په فاسق پسې لمونځ کول، که څه هم مکروه دی، خو صحیح دی او ګنهکار امام دی. په داسې حال کې چې خلک له دغه امام څخه ناراضه دي. لکه څرنګه چې ترمذي په خپل سنن کې له ابو امامه څخه حدیث روایت کړی، چې رسول الله صلی الله علیه وسلم فرمایلي دي:

«ثَلَاثَةٌ لَا تُجَاوِزُ صَلَاتُهُمْ آذَانَهُمْ: العَبْدُ الآبِقُ حَتَّى يَرْجِعَ، وَامْرَأَةٌ بَاتَتْ وَزَوْجُهَا عَلَيْهَا سَاخِطٌ، وَإِمَامُ قَوْمٍ وَهُمْ لَهُ كَارِهُونَ».

ژباړه: د دریو کسانو لمونځ د هغوی له غوږونو پورته نه ځي: تښتېدلی مرییه (غلام) تر هغه چې بېرته راوګرځي. هغه ښځه چې شپه په داسې حال کې سبا کړي، چې مېړه یې ورته په غوسه وي او هغه امام چې قوم یې ترې ناراضه وي.

که په داسې امام پسې لمونځ وکړې، چې ښه اعمال تر سره کوي او تقواداره وي، نو لمونځ دې فضیلت لري. که چېرې له داسې حالت  سره مخ شوې، چې په داسې امام پسې لمونځ وکړې، چې له شرابو مخلوطو عطرو څخه استفاده کوي، نو ستا لمونځ صحیح او ګناه د امام په غاړه ده. خپل امام ته مو نصېحت وکړئ. هغه عطر چې الکول ولري، لکه کالونیا او دې ته ورته نور حرام دي. د الکول لرونکو عطرو د حراموالي په اړه، دغه ځواب ورورسوئ، شاید الله تعالی هدایت ورته وکړي.

د الکول لرونکو عطرو په اړه باید ووایم، چې د شرابو حکم ورباندې کېږي. مسلم له ابن عمر رضی الله عنه څخه روایت کوي، چې رسول الله صلی الله علیه وسلم وفرمایل:

«كُلُّ مُسْكِرٍ خَمْرٌ، وَكُلُّ مُسْكِرٍ حَرَامٌ»

ژباړه: هر نېشه کوونکی شی شراب او حر ډول شراب حرام دي.

د ابو داود له روایت سره سم چې جابر بن عبدالله روایت کړي، چې رسول الله صلی الله علیه وسلم فرمایي:

«مَا أَسْكَرَ كَثِيرُهُ، فَقَلِيلُهُ حَرَامٌ»

ژباړه: هر هغه څه چې زیات یې نېشه کوونکي وو، کم یې هم حرام دي.

رسول الله صلی الله علیه وسلم هغه مایع تشریح کړه، چې شراب نومېږي: هر هغه څه چې زیات یا کم یې نېشه کوونکي وو، حرام دي. دلته مساله د مناط په څېړنې پورې اړه لري. پر دې د پوهېدو لپاره چې دغه عطر، کالونیا او یا هم هر څه، کم یا زیات یې، چې ایا د څښلو پر مهال نېشه رامنځته کوي او که نه؟ نو که چېرې نېشه کوونکي وو، شراب دي او د شرابو احکام ورباندې پلي کېږي. دغه راز د هغه حدیث پر اساس چې حاکم په خپل مستدرک کې بیان کړی، شراب په لسو حالتونو کې حرام دي. عبدالله بن عبدالله بن عمر او هغه له خپل پلار څخه روایت کړی، چې رسول الله صلی الله علیه وسلم وفرمایل:

«لَعَنَ اللَّهُ الْخَمْرَ، وَلَعَنَ سَاقِيهَا، وَشَارِبَهَا، وَعَاصِرَهَا، وَمُعْتَصِرَهَا، وَحَامِلَهَا، وَالْمَحْمُولَةَ إِلَيْهِ، وَبَايِعِهَا وَمُبْتَاعَهَا، وَآكِلَ ثَمَنِهَا»

ژباړه: الله تعالی پر شرابو، ساقي، شرابي، تولید کوونکي، کارونکي، لېږدونکي، پلورونکي، پېرودونکي او همدارنګه پر هغه کس هم لعنت ویلی، چې له پیسو یې ګټه اخلي.

په مایعاتو کې د الکولو د ګډالي په اړه پوهان وایي، چې دغه مایعات عینې لکه شراب نشه رامنځته کوونکي دي. رسول الله صل الله علیه وسلم وفرمایل: «كل مسكر خمر وكل خمر حرام» (رواه مسلم) یعنې نېشه رامنځته کوونکي حرام دي. نو پر الکول لړلو عطرو هم د شرابو حکم پلی کېږي.

ای: یو ځل بیا ټینګار کوم، چې دغه کار باید په سمه توګه او حکمت سره تر سره شي. که یې لاره ومونده نو ښه به وي او که چېرې یې په بې ځایه دلیلونو استدلال کاوه، نو ستاسو لپاره همدا نصېحت کافي دی او تاسو مو اجر تر لاسه کوئ! انشاءالله!

ستاسو ورور عطاء بن خلیل ابوالرشته

ژباړن: حبیب الله حبیب

پوښتنه:

السلام‌علیکم‌ورحمت‌الله‌وبرکاته!

زموږ قدرمن امیر صاحب! له تانه دا پوښتنه کوم چې زه اسلامي دولت د تاسیس لپاره وس نه لرم، نو په دې برخه کې زما رول او مکلفیت څه دی؟ زه د ځواب په تمه یم، له تا نه لارښوونه غواړم، زه حیران یم، نه پوهېږم چې له چا سره شم؟ ستا دې په الله سبحانه وتعالی قسم وي چې زه څه کار وکړم؟

ځواب:

وعلیکم‌السلام‌ورحمت‌الله‌وبرکاته!

ګرانه وروره! الله سبحانه وتعالی هر کس ته د خپل وس په اندازه تکلیف ورکړی. د دعوت رسوونې په برخه کې د خلکو کړنې، توانایي او عملونه توپیر لري. همدارنګه وګړي په علمي او فکري او د حکمت رسولو په مسایلو کې هم توپیر لري. دا هغه مسایل دي چې په بشریت کې دا سې څه نه وو او له شک پرته تکلیف د وس او استطاعت په اندازه دی. څنګه چې دغه مسله په قران کریم او د رسول الله صلی الله علیه وسلم په حدیثونو کې ذکر شوې ده.

الله سبحانه وتعالی فرمایلي دي:

 (لا یكلِّفُ اللَّه نفْسًا إِ لَا وُسْعها)

ژباړه: الله سبحانه وتعالی هېچا ته له خپل وس پورته تکلیف نه دی ورکړی.

 (لا یكلِّفُ اللَّه نفسا الا ما آتاها)

ژباړه: الله سبحانه وتعالی ټولو نفس لرونکو موجوداتو ته د خپل وس او توان په اندازه تکلیف ورکړی دی.

رسول الله صلی الله علیه وسلم فرمایلي دي:

«لا تحْقِرن مِنْ الْمعْرُوفِ شیئا و لوْ أنْ تلْقى اخاك بِوجْهٍ طلْق»

ژباړه: د خیر او معروف هر کار کوچنی مه شمېرئ؛ حتا دا چې په ورین تندي له خپل ورور سره چلند کوئ.

دغه حدیث مسلم روایت کړی دی.

همدارنګه رسول الله صلی الله علیه وسلم فرمایلي دي:

«بلِّغُوا عنّی و لوْ آیةً»

ژباړه: تبلیغ وکړئ، که د یو ایه په اندازه هم وي. (دغه حدیث بخاري روایت کړی دی)

زین بن ثابت له رسول الله صلی الله علیه وسلم څخه روایت کړی چې هغه صلی الله علیه وسلم فرمایلي:

«نضراللَّه امْرأً سمِع مِنا حدِیثا فحفِظهُ فبلغهُ، فرُب حامِلِ فِقْهٍ لیس بِفقِیهٌ»

ژباړه: د هغه چا پر حال خوښي پکار ده چې حدیث اوري او هغه حفظوي او وروسته هغه نورو ته رسوي، ډېر کسان دي چې فقه لېږدوي، په داسې حال کې چې خپله فقیه نه دي. (دغه حدیق طبراتي روایت کړی دی)

نو ګرانه وروره! لازمه ده چې د خپل وس په اندازه په معروف امر وکړې او هغه څه چې منع شوي، ترسره نه کړې. شونې ده چې یو ایت او یا دوه ایتونه تبلیغ کړې. دا شرط نه ده چې د قرانکریم او سنتو شریفو د حافیظینو له ډلې وو. له الله سبحانه وتعالی څخه مرسته وغواړه او پر الله توکل وکړه. الله سبحانه وتعالی له صالحینو سره مینه لري.

ستاسو ورور عطاء بن خلیل ابو الرشته

ژباړن: بهیر «ویاړ»